【製作人專訪】神級LEGO場景製作 還原Iron Man基地全貌

《復仇者聯盟4:終局之戰》都終左成個月,講任何劇情都唔會話死全家啊比人鬧之類啦?大家睇完最唔捨得一定係 Iron Man ,話晒陪住大家由第一集到今時今日足足十年光陰。

香港 LEGO 製作界別亦有個隱世高手 Kenny,三年前開頭諗住好似上面張海報咁砌返個細細地 Iron Man 倉庫出嚟。點知一路睇資料發現可以整大啲整完善啲,加上當時又比佢發現到有第三方 Minifigure 廠商將全部嘅 Iron Man 用官方件全部印刷出嚟,結果把心一橫就不如砌晒成個 Iron Man 基地出嚟。

LEGO MCU Stark Mansion by Kenny Chan

 

聽好多製作人都講過,砌作品用最多時間嘅地方唔係構思、唔係拼砌,而係等喺外國訂嘅組件到手。Kenny 都係一樣,不過喺呢個等待嘅期間佢除左不斷做資料搜集之外,首要就係決定要砌邊個版本嘅基地。 唔講可能好多人都唔知,電影入面三集嘅場景佈置上都係好大分別,而構想嘅時候 Kenny 當然有諗過 LEGO 件嘅可塑性同組件替換上可以做得晒三個不同版本。

最初就係跟其他外國 MOC 製作者 Alentbrick 設計砌起左呢個 7 格嘅部份,之後慢慢擴充到依家大家所見嘅狀態

雖然呢部份唔係全部 Kenny 原創,不過將透明件用官方貼紙 cut 返同官方設定一樣,呢個諗法都算絕

構想總係可以天馬行空一啲,不過做落手始終都要有一啲取捨,最終 Kenny 決定以《Iron Man 3》嘅版本嚟做佢嘅製作藍本。之後嘅日子就係重複睇電影片段、設定集、網上不同有關嘅資源去完整地實現出嚟「最棘手係有啲場景裝置係電影又影唔清楚,設定集又冇記錄到,好彩迪士尼出左個 AR 遊戲可以慢慢睇得返,咁先可以補漏所有細節。」當所有都準備好晒,就梗係要問下 Kenny 去整呢個基地總共花費左幾多錢喺當中啦,話晒我地都唔係 Tony Stark 咁接近無限金錢「本來開始嘅時候都有計住用左幾錢,不過計到咁上下都懶得去計….(苦笑)」

呢個角落嘅機器,就係搞到 Kenny 要搵到 AR 先睇得清楚嘅部份

基地入面三架跑車,大家仲認唔認得?其實都係用官方產品做少少改動砌返出嚟架。

睇完晒上層就到裝甲收藏庫。原本設定係一個圓桶型格式,但 Kenny 為左方便觀賞就改成半圓。中間其實仲有半層嘅酒窖,還原之餘仲有空間加燈


不過有一點 Kenny 自己都好謙咁講到,今次呢個咁龐大嘅作品絕對冇咩神級、高手作品,又冇特別嘅砌法或者技巧,肯去搵花時間搜集資料同慢慢砌的話,堅持要完成一樣可以慢慢逐步做得到出嚟。最後製作者 Kenny 自己都講到,如果有更多嘅資源同時間的話,大屋起居室嘅部份一定會砌埋出嚟,不過依家呢個基地已經係佢非常滿意同滿足嘅作品。

而 Kenny 完成 Iron Man 基地之後都開左個同一班同好交流 LEGO Iron Man 資訊嘅群組,大家想同佢交流下製作心得嘅話都可以去到群組當中搵佢或者 Add 埋佢 Instagram 睇下佢有咩新作。而另外佢都話好快會搵機會將呢個 Iron Man 基地展出,如果大家都想親眼睇到嘅話,咁就要繼續留意住我地嘅報導同介紹啦!

LEGO Iron Man 資訊嘅群組傳送門

Kenny Chan Instagram 傳送門

(拍攝:蕭若翹)

 

 

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章