【E3 2019】《Luigi 鬼屋 3》新片展示全新技能 以及多人協力模式「驚魂塔」

任天堂今日嘅「Nintendo Direct E3 2019」發表《Luigi 鬼屋 3》(Luigi Mansion 3)更多相關情報,今集 Luigi 將會增加四種新動作以及支援多人連線模式「驚魂塔(Scare Scraper Mode)」。

 

 

《Luigi 鬼屋 3》以 Luigi 為主角,玩家將控制 Luigi 喺充滿鬼怪既鬼屋探索。玩家捉鬼時需要用電筒照射鬼怪既心臟,然後使用鬼怪吸塵器吸走佢。根據最新影片遊戲將新增「強擊(Slam)」、「廁所泵射擊(Suction Shot)」、「噴射(Burst)」、「果凍 Luigi(Gooigi)」等四種能力。

新技能「強擊」將會將幽靈吸實,然後將之左右撻並造成傷害,而且本技能屬於範圍攻擊,面對一堆幽靈時幾好用。而「廁所泵射擊」則係射個泵出去,吸住障礙物後將之移走,甚至對幽靈手上嘅盾牌同樣有效。

 

「強擊(Slam)」

「廁所泵射擊(Suction Shot)」

 

至於「噴射」技能係由背包噴出大量氣體令自身進行跳躍,同時震開周圍嘅幽靈。「果凍 Luigi(Gooigi)」則係用大量液體做出一隻「Luigi」替身,可以穿過本身無法穿越嘅陷阱,亦都可以共同使出「廁所泵射擊」技能。

 

「噴射(Burst)」

「果凍 Luigi(Gooigi)」

 

新模式「驚魂塔」係多人協力模式,玩家需協力解開各種謎題,最大支援八人同時遊玩。《Luigi 鬼屋 3》預計 2019 年推出,對應 Nintendo Switch,支援繁體及簡體中文。

 

五木

動漫電玩宅,極愛金田一系列,擅長動作及策略遊戲

追蹤

更多文章