【遊戲介紹】平民衝擊極權政府《We. The Revolution》為左更好生活爭取自由平等

記得電影《V for Vendetta(V 煞)》裡面,V 曾經講過「People should not be afraid of their Governments. Governments should be afraid of their people. 」

當你面對嘅政府出左問題,作為民眾,你會點做?盲目順從,抑或站出來發聲?

 

 

相信大家都有讀過「法國大革命」呢段歷史,今次同大家介紹嘅遊戲《We. The Revolution》,就係以呢段人民反抗政府嘅著名歷史作為故事背景。

《We. The Revolution》由波蘭獨立遊戲工作室「Polyslash」所開發,係一隻策略型文字遊戲,於 2019 年 3 月21 日已經於 Steam 平台上架,定價為 HKD 89。

 

槍指頭:)

 

玩家飾演「革命法庭(Revolutionary Tribunal)」嘅法官,喺呢場反霸權、反封建嘅革命運動裡面,有唔少革命份子、或者貴族以及當權者,會因為各種原因送上法庭來。

根據各種文件、證據、犯事理由;面對民眾壓力、其他執政人士施壓;作為法官嘅你,到底要將面前嘅「犯人」送上死刑台,監禁,抑或無罪釋放?

 

 

呢個遊戲並唔係淨係叫玩家做網路判官咁簡單,因為每個人物背後都有既定關係鍊,蝴蝶效應,你每個決定,都可能會掀起另一次風波;同埋,你並唔係無敵的,如果你唔識審時度勢、或者淨係按個人喜好將人送去死,民怨可能會害死你,又或者你會比人滅聲,甚至比人殺死。

 

 

到底你會目送呢一場革命去到邊一步,呢個就係遊戲嘅難度所在。熟悉「法國大革命」嘅朋友固然會享受遊戲,鍾意社會政治議題嘅朋友或者都會欣賞呢隻 Game。遊戲單機遊玩,目前只對應英、法、波蘭語,敬請注意。

 

Steam 購買傳送門

 

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章