【遊戲新聞】邊個話打機唔關政治事 一聲令下隨時連 Game 都入唔到!

中美貿易戰持續咗一段時間,或者有好多人覺得「我討厭政治」,淨係想打機,所以唔關自己事。但有無諗過如果有一日因為政治問題,搞到連機都無得打呢。講緊嘅唔係咩天方夜譚,而係正在發生緊嘅事情,現時作為全球最受歡迎遊戲一員嘅《英雄聯盟》(League of Legends)就已封鎖伊朗及敘利亞玩家 IP,原因係要遵守美國政府所頒報嘅禁制令。

 

 

其實自去年開始,美國政府已經對伊朗恢復實施最高層級經濟制裁,原因係美國退出「伊朗核子協議」,當然咁講可能好抽象,簡單講就係美國可以制裁協助伊朗貨品流動或交易嘅公司,大家非常熟悉嘅「華為事件」就因為被指向伊朗出口技術而被美國追殺。

當美伊二國關係咁緊張嘅情況下,6 月 21 日時伊朗竟然擊落美國嘅無人偵查機,引起國際嘩然,事後當然各執一詞(相關新聞連結),不過美國總統「侵侵」喺 22 日時就表明會對伊朗發動進一步制裁。

 

又有新一輪制裁,有興趣可以睇 CBS News

 

然後接近同日,喺《英雄聯盟》官方討論區入面,一位自稱黎自伊朗嘅玩家就發帖表示,佢所在嘅國家 IP 已被官方封鎖,出現嘅警告清楚表明「因為美國禁令,閣下所在的國家無法登入《英雄聯盟》,本禁令由美國政府所下令更改,我們期待你日後重回峽谷」。(敘利亞同樣被 Ban IP)

 

呢位玩家表示伊朗係《英雄聯盟》EUW 最大嘅玩家群之一,已經有好多玩家無得入 Game,即使佢表明「政治野我唔理,我淨係想打機」。

 

除咗《英雄聯盟》,EA Origin、Epic Game Store 都已將伊朗列為美國法律禁止存取嘅國家地區,亦即係已經無法登入,就算你本身買斷嘅單機遊戲都無辦法玩。而外國著名論壇 Reddit 有伊朗 Dota 2 玩家表示驚 Valve 都會同樣 Ban 埋伊朗 IP。

 

 

其實由呢件事上見到,就算你唔理政治淨係想專心打機都未必可行,尤其係現時騰訊遊戲已經係全球最大嘅電子遊戲公司之一,對於遊戲限制佢真係夠膽話改就改(睇下王者榮耀限制上線時間就知)!唔想連打機都要比人控制住,作為香港人就應該盡力抗爭,保住打機自由呢片天空。(送中條例過咗,你夠唔夠膽同個名係簡體字嘅人 PVP?)

不撤不退

不撤不退 不撤不退,我愛香港。

追蹤

更多文章