世嘉即將於今冬發售嘅《新櫻花大戰》公佈以來，由於全 3D 模組感覺好似《Jump Force》，加上人設無左原著嗰種「大正奢華」嘅亮麗感，所以唔少《櫻戰》嘅舊粉絲都有少少迷茫。

今日工作室公佈《櫻花大戰 1＆2》劇場之星、擁有萬千 Fans 嘅大小姐神崎堇（神崎すみれ）即將會於《新櫻花大戰》裡面登場！見到呢個消息（文字上）時大家都感到好開心，例如我就發出左「喔喔喔喔喔！！」之類嘅驚嘆聲；不過，當我睇埋新版嘅人設……

大家，覺得點？

舊版嘅神崎堇，有種好濃烈嘅大小姐貴氣、亦都有種傲嬌嘅感覺，一登場就有強烈壓場感；而新版……可能因為年紀漸長，唔再係少女，所以感覺樸實左好多啦。日本方面，無論喺 Forum 或者 Twitter 上面嘅反應都偏向一片哀號，大家似乎都認為新版嘅神崎堇，喺氣場上嘅表現真係太大落差了。

當中亦有部份網友認為「其實唔好出場仲好」「唔好破壞大家嘅回憶」。不過，較年輕嘅玩家就無咁受到衝擊，反應偏向正面。

神崎堇今次回歸《新櫻戰》嘅身份，將會擔任劇場帝國華撃團・花組嘅新隊長，同時係劇場支配人以及總司令（咁大神一郎係咪即係唔會再出場？）暫時唔知佢同新版男主角會唔會有任何新關係元素，不過最有心嘅地方係神崎堇嘅聲優就沿用舊版，繼續由「富沢美智恵」小姐出演聲優。

「富沢美智恵」小姐其實原本已經係半引退狀態，今次再次出山，的確係呢個角色帶比玩家最大嘅正面驚喜。

作為《櫻戰》嘅 Fans 我只能不禁嘆一句「歲月」，同時我必須私心表示舊版人設真係吸睛好多。《新櫻花大戰》同時亦公佈左更多新角色資料，一齊黎同大家分享。

雖然有好多不明朗因素，不過我相信大部份朋友都同我一樣，真香，遊戲出場，都係會玩，畢竟，《櫻戰》除卻戀愛元素，佢嘅戰鬥系統亦都非常吸引；新版系統如何，我地一齊等最新公佈吧。