【遊戲新聞】距離城市崩壞尚餘 21 日《A Place for the Unwilling》請解開朋友自殺身亡之謎

 

西班牙獨立遊戲工作室 Alpixel Games 宣佈佢地最新開發嘅 AVG 遊戲《A Place for the Unwilling》將會於 7 月 25 日推出,對應平台為 PC(Windows & Mac)。

呢隻遊戲由公佈到開發完成,總共用左接近 4 年時間;雖然係細廠作品,不過正因為係小品故事,工作室無話追求極度炫麗嘅畫面質素,反而係將重心擺喺劇本上面。

 

 

《A Place for the Unwilling》係一隻多重結局嘅故事型遊戲。玩家飾演嘅玩家,因為接到朋友自殺身亡嘅消息,而黎到佢所居住嘅地方。遊戲中並唔會有明確指示話比你知「主線」要做乜野,玩家嘅生活方式、以及每一個舉動,都由你自己決定。

惟一一樣要注意嘅地方,就係遊戲有「倒數計時」制度,因為你身處嘅地方,其實只係剩返 21  日嘅「壽命」就會崩壞,喺呢 21 日裡面,玩家去過幾多地方、進行過幾多對話互動、收集到幾多資料,都會影響你最後所見到嘅結局。

 

 

所以,到底最後你係咪可以解開朋友自殺之謎,同時發現朋友遺書裡面提到嘅「城市嘅秘密」,就睇下你於遊戲中嘅每個決定了。

遊戲中玩家可以遇到嘅「事件」超過一百種,所以可以話係一隻非常襟玩嘅遊戲;不過目前只係對應英文同西班牙文,如有中文化消息再同大家分享。

 

Steam 版傳送門

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章