【遊戲新聞】強權打壓!赤燭再發聲明《還願》過度被政治化短期內上架無望

 

由赤燭遊戲開發嘅恐怖遊戲《還願 Devotion》公佈時備受觸目,然而推出後不久,比人發現遊戲裡面符咒圖素上,有發音似「你媽87」嘅「呢」、「嘛」、「叭」、「唭」字樣,以及「熊維尼習近平」嘅字眼。

 

 

因為以上字眼被認為有「侮辱國家最高領導人」之嫌,於是遊戲於中國玩家群裡一秒炎上,五毛黨馬上去《還願》Steam 平台留言區進行留言評分攻擊,而呢件事亦驚動中國嘅內部審查機關,代理遊戲於中國大陸發行嘅「indievent」、以及於海外發行嘅陸資公司「唯晶科技」,馬上割蓆,中止與赤燭的合約之餘,仲要求赤燭賠償損失。

 

 

《還願》馬上下架處理,並變成大陸網站禁搜關鍵字。

事隔數月,《還願》風波尚未平息,赤燭昨日就於網上各平台作發聲明:

 

 

赤燭方面表示「六位創辦人一致同意,短期內《還願》將不會再以任何形式銷售、改版、或透過其他授權來營利,以避免造成更多不必要的誤解。」,所以就算遊戲推出初期評價再高,如果當時無入手嘅朋友,或者只能喺網上平台搵相關遊戲片段黎睇了。

 

 

當然,赤燭亦強調今後唔會放棄創作,而事到如今,亦無拎出任何一個員工名字出黎「祭旗」,團體精神可嘉;不過,今次呢件事亦見證到中國政治打壓嘅「威力」,網上有好多聲音話「赤燭點解要同大陸公司簽約」,營商嘅決定我地並唔理解,所以唔評論;亦有網上聲音認為赤燭再發聲明,係想再一次向中國方面道歉,俗稱「跪低」。

各位網友,你地又點睇呢?

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章