【遊戲新聞】崩壞・追想・究明《十三機兵防衛圈》完全版三部曲 11 月尾正式登場

 

由 VanillaWare 與 ALTUS 聯手推出嘅《十三機兵防衛圈》已定於今年 11 月 28 日正式上架,預計售價為 8,980円(未連稅),預購特典為包含 13 位主角人設以及遊戲美術圖在內嘅《Digital Art Works》數位美術集一份。

《十三機兵防衛圈》美術部份由曾製作《奧丁領域(Odin Sphere)》以及《朧村正》嘅團隊負責,遊戲中獨特嘅 2D 畫風以及捲軸型玩法係遊戲備受注目嘅地方之一。

 

 

《十三》以 13 位少年少女為主角,並以佢地各自嘅視點去構成故事,令玩家可以多角度去了解劇情。故事背景設於 80 年代東京,突然出現嘅巨型異種生物襲來,但又發現原來呢一切與「過去」及「未來」都有重大關係。《十三機兵》係一個橫跨唔同年代嘅超現實科幻故事。

編輯部亦有為早前於 3 月發售嘅遊戲序章撰寫感想文,有興趣嘅朋友可以【參考呢一度】。

 

 

官方今日就遊戲公佈更多資料, 即將發售嘅「完全版」嘅《十三機兵》共分為三部劇情,包括玩家需要操作機兵進行戰鬥嘅「崩壞篇」、披露 13 位角色各人秘密嘅「追想篇」以及道出故事真相嘅「究明篇」。

雖然遊戲為 ADV(文字向遊戲),不過《十三機兵》亦喺傳統 ADV 玩法上面嘗試做出大量互動以及動作操作,而玩過《序章》嘅朋友,相信亦已經對遊戲中重重謎團感到好奇不已!

 

 

《十三機兵》首次公佈已為 2015 年,漫長嘅開發期黎到 2019 年總算告一段落。如果你對日本文化有興趣、或者同我一樣係 ADV 遊戲愛好者,呢隻《十三機兵防圍圈》絕對係今年 11 月尾嘅不二之選,對應平台為 PS4!

 

 

相關文章:
【最佳先行導讀】三小時絕對唔夠喉《十三機兵防衛圈 PROLOGUE》無諗過劇本居然如此黑暗吸引

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章