【遊戲新聞】廣招信徒自己做神 《Godhood》誅滅異己發大財

人類一直以黎都好興玩做神運動,最近嘅例子應該就係台灣嘅「發大財之神」,香港亦有失敗例子「光頭白框眼鏡」。遊戲界亦都有唔少做神作品,例如經典《上帝也瘋狂》、《Black & White》等等。黎緊玩家又有得體驗做神啦,呢隻叫《Godhood》嘅遊戲開宗明義,要大家廣招信徒,唔知有無得教佢地唱埋「發大財」聖詩呢?

 

 

遊戲由獨立遊戲團隊 Abbey Games 開發,屬回合制模擬遊戲。遊戲中玩家自己當然係扮演「神」嘅角色,不過你就要落手落腳去建立屬於自己嘅宗教。第一樣就當然係廣招信徒,然後再去培養佢地嘅美好或陰暗面,然後令佢地成為傳教士再去招納更多嘅信徒,從而壯大自己宗教。

 

有得設定自己嘅屬性、型態等

當開始有啲勢力時,就可以建造聖地或寺廟呢類信仰中心,當有呢類建築物後就可以擴展自己聖地。

 

當然遊戲中仲有其他宗教存在,當你嘅信徒遇上異教徒時就可以採用各種手段令對方改信我教。而呢啲手段包括恐嚇、說得、調情甚至用武力令對方屈服(亦係最有效手段)等等,朝成為世界最偉大嘅神目標進發。

 

 

《Godhood》已時於 Steam 正進行開放搶先體驗,暫時開放四種宗教類型(戰爭、和平、性慾、貞潔)以及 13 種門徒類型,而正式版就未有上市日期,大家試住先啦!

 

五木

動漫電玩宅,極愛金田一系列,擅長動作及策略遊戲

追蹤

更多文章