經過四年等待，由「惡魔城之父」五十嵐孝司所製作嘅《血咒之城：暗夜儀式》（Bloodstained: Ritual of the Night），遊戲以惡魔城最受歡迎嘅《月下夜想曲》為藍本製作。而喺 Kickstarter眾籌時更曾經成為籌得最高金額嘅遊戲項目（後來比《莎木 3》超越），聲勢就好勁啦，咁到底隻 Game 到底好無玩呢？
《血咒之城：暗夜儀式》主角係一位被煉金術士詛咒，皮膚正逐漸變成水晶嘅孤兒 Miriam（遊戲內稱為「碎片人」），為咗解除詛咒，於是就進入「惡魔城」尋找同樣受到咀咒嘅召喚師 Gebel 幫忙，過程中慢慢發現有啲唔對路，然後就逐步揭開真相，都係一貫劇情。
隨劇情推進，會一步步揭開真相
遊戲中會出現書架，當中有部份會紀錄各種故事內容，幫助了解劇情
遊戲採用 2.5D，即係畫面係 3D，但係角色係以 2D 形式橫向移動，以往有玩過「惡魔城」系列嘅朋友應該一秒上手。順帶一提，PS4 同 Xbox One 均提供 60Fps，而 PS4 Pro 及 Xbox One S / X 皆支援 4K@60Fps，玩起黎非常暢順爽快（ Switch 版本以 720p@30Fps 運行）。
遊戲中特別場景，版圖會一直旋轉，以立體方式呈現
其中一場 Boss 戰亦有使用相同方式表達，頗有心思
隱藏地圖「8 Bit」，全地圖及怪物皆以紅白機年代面貌出現
同《月下夜想曲》一樣，角色以及隨行使魔係有得升 LV。不過角色必殺技就取消咗，不過個別武器仍然有專屬必殺技，而且實用度以及威力比起《月下夜想曲》強得多。另外由於 Miriam 係「碎片人」嘅關係，佢並無法使用「聖水」、「飛刀」等驅魔道具。取而代之嘅係 Miriam 可以使用多種「碎片」力量（每隻敵人都會有機率掉落），比起《月下》更多元化。
打倒敵人隨機掉落碎片
今集最強使魔，升爆之後會有5個頭，攻擊力高反應快
「碎片」可謂今集最重要系統，當中主要分為主動同被動二種類型。顧名思義，主動型就即係一啲攻擊技能又或者係魔法；而被動型就多數係加強能力值又或者附加如水下移動等特殊能力。製作團隊為咗增加耐玩性亦為「碎片」增加「級別」及「品級」二項強化能力，可以靠獲得數量提升「品級」，而「級別」就需要用到今集另一重點系統「鍊金」。
所有碎片都有「級別」及「品級」二項強化能力，所有能力強化系碎片只要升爆晒二項，就會變成被動技能，亦即係話只要有恆心，本作主角將會係歷代最強角色
要使用「鍊金」就必需有相關鍊成素材，當收集好素材後就可以鍊出武器（著名嘅真空刃就需要鍊出黎）、防具、碎片（有只限鍊金才能獲得的種類）、甚至係料理。除咗基本製作之外，亦都可以使用「分解」將物品還原做素材。遊戲中只要鍊成過一次嘅物品就可以係商人度用錢購買，由於部份素材係極為稀有，所以後期好多時都係用錢買武器再分解獲得素材。
料理非常重要，除咗可回復體力、魔力外，第一次食用該種料理時會有特別能力永久加成，所以每種料理都要食一次
強化碎片亦需要用鍊成，越高等級所需素材就越難得到，所以要善用分解
最高階武防同樣需要鍊成獲得，圖為今集「真空刃」
係戰鬥部份，本作武器種類尚算豐富，當然不得不提嘅就係必殺技系統。雖然今次角色並無自身必殺技，但係各種武器都會有對應必殺技，例如功夫鞋就有三連踢，當該技能練到 Master 後就會解除武器限制，該類型武器全部都可以使出該招必殺技，當中尤以刀劍「格檔」最為實用。
每種武器都有特定類型必殺技，對應武器可以係書架中查看
技能熟練度升爆時就會出現「習得秘技」，同時解鎖武器技能限制
遊戲中最強劍技「格擋」，成功時自身不損血同時使出強力一擊，熟練後可以當自己玩緊《隻狼》
不過遊戲前期開荒極為困難，因為無法使用吸血回生命等技能，亦即係話無血時只可以食補品回血，但前期極缺金錢情況下要買補品真係好肉痛。但當進度推進到得到二段跳後就會漸入佳境，到後期得到無限魔力時直頭可以開無雙，齋用魔法已經無敵一樣，基本上係越玩越易玩。
前期經常出現貧血情況
中後期可得到回血技碎片
得到無限魔力眼鏡後，可以使出最強替身「世界」令時間停頓！
配合其他武器，戰鬥方式亦隨之改變，好玩
有埋加速器之後，直頭玩超音鼠咁
《血咒之城：暗夜儀式》整體不論係畫面、音樂、打擊感、流暢度等等皆屬上品，四年等待完全值得。比較失望嘅係整體流程短（無逆惡魔城），登場 Boss 亦略嫌不足，理應最方便玩家嘅 Nintendo Switch 版亦只有 720p@30Fps，但係本作仍然會係今年最佳橫向動作遊戲獎項大熱之位。
最後附上人權圖
VJGamer總編，細細個已經蒲機舖，機齡甚深，熱愛電玩文化。