【遊戲新聞】美國多人死亡槍擊案侵侵歸究《COD》同《Fortnite》!希拉莉出文反駁

 

(上圖來自 The New York Times)美國上星期六發生槍擊殺人事件,地點為德州 El Paso(埃爾帕索)嘅超級市場 Walmart,截至目前為止,造成至少 20 人死亡、26 人受傷。

意外發生數日之後,美國總統特朗普(侵侵)於 8 月 5 日於白宮會見記者時,就讀左份聲明去回應呢件事;不過,佢份聲明一出,又令到網路炎上,事關侵侵認為槍擊事件,與電玩遊戲有關,認為「遊戲教識國民點樣殺人」。

 

 

矛頭之所以指向《Call Of Duty(COD)》系列以及《FORTNITE》,係因為今次 Walmart 殺人事件中嘅兇手 Patrick Crusius,曾經於美國論壇 8chan 上面提到過自己係《COD》玩家,而佢每日亦會花六個小時於《FORTNITE》裡面(Forbes 報導參考

 

 

喺聲明讀出前兩日,與侵侵同屬美國共和黨成員嘅 Kevin McCarthy 亦都喺 Fox News(霍氏新聞)上面提到,電玩遊戲會令到玩家產生「dehumanize」嘅影響,令佢地覺得殺人無咩大不了。

 

 

以上報導同聲明一出,三間遊戲公司包括 EA、Activision 以及 Take Two 馬上股價下跌,而《Call Of Duty》嘅廠商 Activision Blizzard 嘅股價下跌就最犀利,收市前跌左 6.1 %。

不過,希拉莉就有另外一種睇法,佢話全世界大把人打機,美國之所以有咁多類型槍擊事件,問題,來自「槍」。

 

 

美國嘅「槍械管制」問題係存在於國家好多年嘅爭論,幾乎每次有槍擊事件,就會有政黨人士以及民間團體出黎嘈一次;不過呢個「政治問題」我地呢啲「外國勢力」就唔討論太多,睇返遊戲界本身,美國網友同埋遊戲業界就發起左「#VideogamesAreNotToBlame」活動,反對政府每次都將暴力事件賴落電玩遊戲度。

 

 

我地只能夠講一句:有邊個政府係唔賴皮?

願死難者安息。

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章