【讀者投稿】星矢最怕係,紫龍叫佢唔好衝

睇動漫,可以學到好多嘢,最近睇完Netflix《聖鬥士星矢》,又去咗台灣睇星矢展,重溫一次原著,又有得著。 就係之前諗極都諗唔明,點解星矢打極都唔死。

 

 

明明聖域同城戶光政都無出糧俾佢,點解佢仲要打生打死,仲要打極都唔死?守護女神雅典娜,本來就係黃金聖鬥士嘅責任,但偏偏班廢中變晒和理非,選擇對暴政視若無睹,唔接受自己其實守護緊一個偽政權。

穆先生唔會衝,米羅更唔會衝,可能仲會好似大J 咁講「忠言逆耳,不過聽我發表下意見」,會話,呢個教皇,唔係你可以反抗到架;卡妙可能會講,你搞事就係唔啱。

 

 

聖域咁多廢中,沙織又咁傲嬌,星矢憑咩支撐落去呢? 有人話係五小強嘅友誼,雖不中,亦不遠。

友誼唔係一句口號,我發現,每次星矢跌低,又或者好似朱凱廸咁去到「樽頸位」,都無人會話衝緊嘅星矢「我到底睇咗啲乜嘢」,無人會割蓆;就算班廢中黃金聖鬥士唔敢衝,個個留喺自己個宮「緊守崗位」,都唔會話星矢半句,因為大家都知道,青銅係呢個地面上最後嘅行動派了,如果連星矢都開始諗「衝擊係咪唔啱」,成個聖域就會玩完。

 

 

不割蓆係星矢呢隻「小強」打不死嘅秘密,仲有每次已經衝唔到嘅戰友,都係不斷集氣俾佢,送盾嘅送盾,送鏈嘅送鏈,大家仲記唔記得,本來係建制派、世界首富希臘船王梭羅家族的繼承者朱利安,自己衝唔到,但都無同哈帝斯「篤灰」話班小強入緊極樂世界,反而仲幫手運物資,而呢個,都係令到星矢強大嘅原因之一。 唔係話唔俾反省,唔知大家仲記唔記得,成套漫畫,紫龍曾經阻止過星矢一次,叫佢唔好衝。就係闖進雙子宮嘅時候,紫龍用心眼,睇得出成個宮只係一個陷阱,於是紫龍叫佢「停一停」,之不過,當時紫龍係有解決方案俾到星矢,於是勇武和理非大合作,咪成功離開迷宮。

 

 

如果當時紫龍話「唔好問我應該點做」,我估星矢真係會對呢位戰友相當失望,亦由於友誼出現裂痕,之後更加無可能打贏撒加。

好老實,星矢本身只係一個死𡃁仔,佢又未去到希羅尤嘅境界。車田正美畫呢個角色,多多少少都有另一套作品《拳王創世紀》(天龍版叫《聖拳小子》)入面高嶺龍兒嘅影子,都係本身無咩權欲,卻為世所逼。如果唔係獅子座率先「濫捕」,班友都唔會咁快攻入聖域了。

 

 

聖域根本無回應過點解女神會在野呢個問題,就算星矢成班人去聖域集會,聖域嘅回應,就係派天箭座無預警之下放箭,仲要擊中雅典娜。你要明白,女神雅典娜就好似果位立場妹妹咁神聖,你連女神都搞,星矢有咩辦法唔勇武?

 

 

講到尾,星矢衝到今時今日,本身就有個過程,過程中有不同要求,唔係話唔俾反省,但唔該唔好影響士氣囉,無士氣星矢點谷神聖衣呀?醒少少。

咁星矢去到處女宮差唔多冚包散後,仲衝唔衝好呢?喺套漫畫入面,星矢就選擇咗衝嘅,原因只得一個:女神中箭,聖域未還公道,方法可以變,但目標應不變,同教皇仲有咩可以傾?

性暗示星矢

性暗示星矢 一秒可以揮動一百個願望,卻不能為自己許願的人。「《無雙大蛇》兩代全角色滿級嘅男人。」 但願在遊戲中找到一位,替你默默刷聖衣箱,能讓你掌握第八感的女人。

追蹤

更多文章