【遊戲新聞】小島神疑似鋪路落 PC《DEATH STRANDING》靜靜雞從 PS4 獨佔遊戲區移除

 

小島秀夫大神嘅全新遊戲《Death Stranding(DS)》已定於 2019 年 11 月 8 日全球發售,呢隻充滿電影既視感嘅歷險遊戲,自公佈以黎都備受玩家關注。

《DS》一開始公佈時打著「PS4 獨佔遊戲」嘅旗號,直至今年 5 月為止,喺 PlayStation 官方網站上面,都仲可以見到《DS》係歸類為「PS4 Exclusives」:

 

 

8 月 6 日時,曾多次擔任 E3、Gamescom 主持嘅著名遊戲活動主持人 Geoff Keighley 就喺 Twitter 上面預告,小島秀夫將會於 8 月 19 日 Gamesom 期間公開有關《DS》遊戲嘅全新獨家消息。

 

 

而亦都係喺 8 月 6 日,有網友於論壇 ResetEra 上面開 Post,發現左原來《Death Stranding》已經靜靜雞地從「PS4 Exclusives」一欄中移除左,佢驗證過英國、美國、澳洲以及歐洲四個地區嘅 PS Store 都發現有同一現象。

由於《DS》最初公佈時(2015 年 Sony 新聞稿內容),小島曾表示過「遊戲落完 PS4 之後會落埋 PC」,但係唔知幾時開始就變成 PS4 Exclusive,今次網友發現嘅狀態,令大家有理由懷疑小島應該會繼續考慮將《DS》擺埋去 PC 平台。

 

圖片來源:ResetEra

 

所以 8 月19 日小島嘅公佈到底會係咩野內容?到底同 PC 平台會唔會有任何關係?有最新消息我地會再同大家報導。

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章