尋日，我地報導左「台灣格鬥電競選手 Gamerbee 發聲支持港人」嘅新聞，原來我地香港都有兩位選手同時於 Facebook 專頁上支援發聲，佢地就係 Humanbomb 以及 Hotdog29！佢地不約而同地發表 Facebook 帖文，除左向下星期依然無懼前來香港參加格鬥電競比賽嘅外國選手提出支援之外，仲暗暗向為香港奮鬥緊嘅朋友打氣。

作為國際級嘅選手，仲要係香港人，Humanbomb 同 Hotdog29 當然都會承受各種壓力，例如係贊助商、廣告商或者係中國「支持者」嘅注視；不過，身為香港人嘅佢地都並無置身事外，以佢地嘅方式、喺佢地嘅能力範圍入面，默默表達佢地嘅支持。

Humanbomb 目前於《Capcom Pro Tour》世界排名 98 位，亞洲排名 24 位；Hotdog29 則世界排名 30 位，亞洲排名 14 位。

HB 加油呀！

成績好好！！

《Capcom Pro Tour》雖然取消左香港站，不過按兩位所講，似乎原定日子都仲係會有一場賽事舉行，我地到時會再作詳細報導跟進。

我地作為香港嘅遊戲媒體，好多謝兩位選手願意發聲，亦好希望睇到呢篇文嘅大家，都去佢地嘅專頁多作支持！

【Humanbomb FB Page】
【Hotdog29（hotdogistasty）FB Page】