為左迎接 2020 年東京奧運會舉行，日本方面近期不斷推出有關運動競技嘅遊戲，例如早前同大家介紹過嘅《瑪利歐＆索尼克 AT 2020東京奧運》。呢隻 Mario（任天堂）同埋超音鼠（世嘉）合作推出嘅遊戲，即將於 2019 年 11 月 1 日推出，早前亦於網上公開遊戲宣傳片段。

不過，唔少玩家都發現左一個好重要嘅生理學問題，就係華利奧（Wario）唔知點解，心口兩點居然被消失！

首先，其實，呢條 Trailer 片段我睇過兩次，當時都唔覺得有咩唔妥，如果唔係外國媒體 GamesRadar 提起，我諗，我可能再睇多十次，都唔會留意到（亦唔會在意）到底 Wario 有無心口嗰兩點。唔通外國人對於呢兩點果然特別在意嗎？

不過，好笑嘅地方係，其實遊戲中其他角色係有顯示胸前兩點的，就算係 Mario 自己，於其他遊戲裡面都有清晰顯示心口兩點粉紅色；所以黎到今次嘅《東京奧運》遊戲，企喺獎台嘅蛋頭博士，同埋 Wario，兩人赤裸嘅上身，嗰兩點微妙的不同，真係非常耐人尋味……

Mario 有

咁睇又好似有少少…（？）

距離《瑪利歐&索尼克 AT 2020東京奧運》 仲有大約兩個月，玩家可以於遊戲入面暢玩各種奧運競技項目與小遊戲，仲會有體驗故事劇情嘅「故事模式」等要素。希望大家到時玩「水泳」項目唔會淨係將注意力擺喺 Wario 嘅心口啦（笑）