大 IP 出劇場版都係正常動作，不過老實講多數作品嘅劇場版都係特別出一個架空故事，然後多數都係跟一堆無乜誠意嘅劇情，最後 BBQ 再一齊跳起 Yeah 完場。琴日我地有幸受邀出席最新《ONE PIECE》劇場版《ONE PIECE STAMPEDE》（海賊王：奪寶爭霸戰）首映禮，對比上一套劇場版《ONE PIECE FILM GOLD》簡直係一個天一個地，《ONE PIECE STAMPEDE》絕對令 Fans 驚喜，以下做返少少無劇透分享！

Neofilms 新映影片特別請黎路飛（三十年後橡膠鬆晒版）同港版配音周恩恩小姐，非常有心

《ONE PIECE STAMPEDE》係第 14 部劇場版，同時係電視動畫 20 周年紀念作品。故事講草帽海賊團收到「海賊萬博會」請柬，而勝利嘅獎品就係「海賊王」羅傑所遺留嘅寶藏，而背後其實有陰謀進行中，一切就係呢個財寶爭奪戰拉開序幕。

故事由一開場已經瘋狂連場激戰，而且「最惡世代」一眾角色都有出場，亦都不乏表現機會。電影劇情節奏明快，雖然同樣係特別創作一個故事，但係今次嘅大奸角，外號「鬼之繼承者」道格拉斯·巴雷特除咗係原羅傑海賊團船員，實力隨時比「冥王」雷利更強，呢個設定令新角色即使無太多介紹，但觀眾已經都會對佢有一定了解，處理手法高明。

因為係無劇透影評，所以有關故事內容就唔講太多啦，不過當中都有唔少驚喜位，其中最令人驚喜嘅地方，就係今次劇場版絕對係整個《ONE PIECE》故事最接近寶藏「ONE PIECE」嘅一次，詳細就留待大家入場睇啦！

另一個感動位，可能就同香港最近嘅情況有關。劇情有一節係講到不論出身、陣型、個人喜惡，只為同一個目標而完全信任對方，再一次展現出「We Connect」團結精神。投射返去香港嘅情況，勇武派、和理非、泛民、本土派一齊為自由、公義而挺身而出，由動畫再次去提醒我地「團結」嘅力量，果下我真係有啲眼濕濕。

今次呢套劇場版《ONE PIECE STAMPEDE》整體表現出色，動作場面係超、級、多，真係由頭打到尾無停過，唯一要挑剔嘅就係除咗索隆同烏索普之外嘅船員都無乜表現機會。另外真心推薦黎緊想入場睇嘅觀眾盡量買「4DX」版本，戲中所有動作場面、海上載浮載沉、水花飛濺等等特效都做得非常出色（仲有其他神秘特效），配合電影畫面有加乘，不過就唔好食飽入場睇，唔係我驚你比路飛橡膠槍打到想嘔。