【遊戲新聞】雖然係冷飯但係真香《Xenoblade》一代經典即將高清化落 Switch

 

有Switch 嘅朋友,相信你地好多人都有玩過《Xenoblade 2》,呢隻出色嘅 RPG 成功地喺唔少玩家心中留下強烈印象。如果想玩返第一代《Xenoblade》嘅朋友,今晨嘅 Nintendo Direct 就帶黎好消息,就係將會推出高清 Remaster 版本嘅《Xenoblade Definitive Edition》,預計 2020 年於 Switch 平台上面推出。

 

 

《Xenoblade》初次推出為 2010 年,當時對應平台為現已停產嘅 Wii,工作室為 Monolith Soft,屬於《Xenosaga(異域傳說)》系列嘅世界觀,為一隻單機 Open World RPG。

主角シュルク(Shulk)生活喺「有機生命體」與「機甲生命體」互相對抗生活嘅世界,因為各種原因,捲入左牽涉人類存亡嘅事情入面,為左對抗機甲兵而踏上旅途。出色嘅劇本、以及廣闊嘅探索空間,令到《Xenoblade》當年得到一流評價,亦喺好多 RPG 愛好者心目中得到極高名次排名。

 

 

遊戲曾於 2015 年移植 3DS,以及 2016 年作為 Wii U 數位下載限定推出,不過今次呢個《Xenoblade Definitive Edition》就唔係單單移植咁簡單,官方透露,遊戲中嘅圖素採用高清處理,但係人物模組係重新構造的,所以希望帶比玩家煥然一新嘅視覺感受。

有更多消息以及正式發售日會再同大家報導,以下係遊戲最新宣傳片段:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章