【遊戲評測】印證警察黑道是一家 《熱血硬派外傳》打擊警賊人人有責

「熱血系列」年青一代機迷可能唔知係乜黎,但係有返咁上下機齡嘅朋友就一定有玩過相關遊戲,屬大家兒時必玩系列。最近「熱血系列」就推出最新一集《熱血硬派國夫君外傳 熱血少女》(熱血硬派くにおくん外伝リバーシティーガールズ) ,雖然遊戲用像素風格但係玩落不但無過時感覺,喺遊戲入面仲見都製作組埋藏唔少「梗」,好鬼死正!

 

 

《熱血硬派國夫君外傳 熱血少女》由 WayForward 同 Arc System Works 共同開發,屬傳統類型平面橫向捲軸動作遊戲。今集人物由以前嘅二頭身更改為三頭身比例,而主角就由以前嘅配角「美佐子」(Misako)同「京子」(Kyoko)擔正。

遊戲故事就一貫英雄救美劇情,由學校一直穿梭各區戰鬥,呢點同其他遊戲差唔多。而戰鬥操作亦頗簡單,基本輕攻擊、重攻擊、跳同擋制,除咗普通攻擊亦有得「納」架生打人,不過最主要技巧都係玩走位,保持到一貫嘅「熱血味」。

 

執武器係熱血系列精粹

戰鬥以外仲有唔少有心思小關卡,圖中關卡就係要避開地上啲嗶嗶聲鴨仔,喺唔嘈醒警衛情況下偷鎖匙

遊戲中不時穿插漫畫劇情

 

遊戲中途擊敗敵人後會得到經驗值同金錢,升級就自然係加基本屬性,而錢就要黎買補品、道具同學招,招式有最基本嘅增加攻擊段數,亦有各種特殊技及必殺技學。而購買嘅道具都幾多元化,有加攻擊力有增加起上無敵時間,仲有使用後手持武器唔會損壞嘅特殊道具。

 

所有商品未使用之前都係唔知效果的,要慢慢試

學返黎嘅招大部份都有用而且幾符合角色設定

 

不得不提嘅就係 Boss 戰做得頗有心思,每隻 Boss 都各有特色同攻略方法,而且攻略方法係要靠自己摸索,遊戲中並無任何提示。另外每隻 Boss 都起碼有三格血,每扣一格血就會增加攻擊模式,越後期 Boss 就越難打,完全無 Hea 玩家,抵讚!

 

每隻 Boss 都有各自充滿個性嘅招式,好似呢隻 Boss 就要大家玩音 Game

另一隻 Boss 就長期飄浮於空中,玩家要思考點令佢落地

每隻 Boss 登場前都會有一段中二味十足嘅動畫片段,好有 Heart

 

不過我地留意到本作最有趣嘅地方,就係設定上每個關卡嘅 Boss 唔係綁架犯就係黑道之類人物,但係出黎攔截你嘅除咗不良少年、黑道之外仲會有警察聯手!再睇返二位主角只係高中生黎,但係啲警察就一棍一棍毫不留情咁打落去,真係估唔到製作組早就看透世事,用遊戲去同大家講警黑是一家、黑警打細路係國際常識,以遊戲廠商黎講真係行得好前!

 

基本上大部份地區都會見到警察同黑幫、不良少年聯手去打高中生

最終 Boss 係黑道老大,解釋咗點解警察會幫黑道

除咗警黑一家之外,遊戲仲隱藏住唔少「梗」,留意下背景人物

爆機後有得使用二位原祖主角

 

總結:

《熱血硬派國夫君外傳 熱血少女》整體真係做得唔錯,遊戲長度恰當,打擊感高,音樂又好聽。缺點係每隻角色要獨立練,每隻角色都要各自儲錢買技同練 LV,不過由於金錢並非共享,所以多人遊玩時可以玩鬥快搶錢又幾有以前打街機嘅味道。

最後不得不提一點,香港今時今日處於一個極之敏感嘅狀況下,Game Source Entertainment 亞洲遊戲娛樂公司仍然肯入一隻咁有態度嘅遊戲,企喺香港人果邊向政府說不,呢種風骨真係值得支持!

 

 

《熱血硬派國夫君外傳 熱血少女》已於 9 月 5 日正式推出,對應平台為 PlayStation 4 / Nintendo Switch / Xbox One / PC Steam。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章