黎緊嘅 9 月 26 日，PS4 平台上面分別有兩隻大作登場，分別係《CODE VEIN 噬血代碼》以及《伊蘇 9 -Monstrum NOX-》（日文版）。喺早前嘅 TGS 2019，編輯部訪問左 Falcom 社長兼遊戲製作人近藤季洋先生，亦都有機會試玩遊戲。

好多朋友成日會問，《伊蘇》系列有咁多集，如果無玩過以前嘅作品，係咪就會跟唔上新作品嘅進度？喺呢度必須要同大家說明，雖然喺世界觀上面，《伊蘇》歷代係一個既定大綱；不過，基本上《伊蘇》近年來嘅遊戲，都係每集都獨立成章，所以就算中途下坑，都唔會有跟唔上劇情嘅情況（筆者都只係由第五代玩起）。

TGS 會場內試玩攤位。多謝 Falcom 同事極為親切招待！

早上十時開場無幾耐，試玩區已現長長輪候隊伍

《伊蘇 8》推出之後，無論故事編排以及動作都喺玩家間有極佳評價，而即將推出嘅《伊蘇 9》喺動作方面就再度加強。今次遊戲以「怪人」以及「異能」為題材，角色除左慣常嘅攻擊動作，仲會有牆上行走、飛行、潛行等特殊能力，所以遊玩時靈活度變化更大。

至於故事方面，Falcom 一向係塑造劇本嘅能手，今集《伊蘇 9》都會喺一片謎題中展開，製作人仲表示「唔玩到最後，都絕對唔會知道真相係點」。對於老 Fans 黎講，遊戲今次嘅地點非常接近初代原點「艾絲坦尼亞」，而遊戲中唔少遺跡同人物造型，處處都有「翼人」嘅影子，未知故事會有幾多「回歸原點」嘅線索透露？

《伊蘇 IX -Monstrum NOX-》將會於 2019 年 9 月 26 日推出日文版，繁體中文版發售日有待公佈。