【讀者投稿】橋唔怕舊,最緊要受《Gears 5》想做開放世界但係心有餘而力不足

 

文長,涉及劇透,總結在最尾,想睇評分可直接跳到最後。
(利申,本評論只包括《Gears 5》單人劇情部份,多人遊戲部份並無評分)

毫無意外地,Microsoft 今年又推出佢地僅有既幾個獨佔大作之一:《Gears》系列既最新作。今集既《Gears 5》脫下左「of War」既命名,主要係故事既原因。《Gears of War》本身就已經係以「Gears」為主,「War」為副,講述既係一眾戰士既血肉故事,只不過呢個故事既背景係打緊仗咁解。

而去到第五集,故事已經同「War」冇太大既關係,轉而真係講女主角既身世同埋同行朋友既關係,而且今集成個故事大半都係女主角同朋友既冒險故事,同戰爭無關,算係系列既一大改革。

 

 

講優缺點之前我地來睇睇呢個世界到處都存在,連虛擬世界都存在既政治衝突先︰

因為驚你睇唔到圖,打埋字你睇︰

白鳶尾 這是真的。

基地建造者中有反叛勢力
今天,我們要公開說出真相。

為 2 號聚落大屠殺進行守靈祈禱的那一天,我們得到的是空洞的承諾和敷衍的妥協,我們卻為此感到滿足。身為公民,我們已經幾乎要忘了那一天,是抱持著甚麼樣的理由決心讓大家聽見我們的聲音。

政府創建2 號聚落時許下了承諾,聚落公民擁有自治權,有權滿足社群的各種需要,並能自行決定聚落群體的前途與命運。

直到今日,這兩種權利依舊沒有落實,而屠殺我們的罪犯依舊逍遙法外。

作為新艾菲拉的延伸區域,我們只能日復一日的遵守首席部長嚴格又完全無效的政策方針。任何與新艾菲拉理想不同的想法都幾乎等同於叛國。

這種現狀不能再持續下去了。

我很快會再次與你們對話。

 

 

而個首席部長係咁既樣︰

嗱唔關我事架!人地 Game 來架咋!一定唔係講緊你啦!唔洗擔心喎!

 

係講優點同缺點之前,講左個故事先。《Gears 5》既故事唔能夠以好壞作論斷,因為都未講哂!其實《Gears 4~6》既故事就同《Star Wars 7~9》一樣,係一個承先啟後既延續故事。而且成個故事既架構係一模一樣。

舊既角色都係過下場,男主角二代(Ben Solo/JD Fenix)先係做下壞人,跟住又做返好人,而唔知邊度出來既女主角就花左大部份既時間同佢既黑人朋友同埋機械人朋友去冒險(Rey/Cait、Finn/Del、BB-8/Jack)。無意中就鋪左條路出來比大家去估女主角既身世之謎。

唯一最大既分別就係 Rey 又真係冇身世之謎,但 Cait 就毫不意外地遵循習俗︰係《Gears》入面做得主角既,父祖輩必定係同成個世界既危機有重大關係,然後?然後仲鋪緊呀!所以你明點解個標題咁多個啟啦!承先啟……….後。

 

 

《Gears of War 4》我當你啱啱開先三部曲,比你懸疑下,去到第五集就用左一大堆時間去大冒險,但係其實數返只係做左幾樣野。你已經搞唔清楚佢係唔夠故事去填滿個遊戲長度,定係佢有好多野要留返下一集先講,但同《星戰 8》一樣,最後乜都冇解釋就咁大爆炸然後就急急腳完左。成日都承先啟後,你啟撚完未啫!比個答案來啦!

佢既故事同電視劇或者係《MCU》一樣,一日未去到最後,都唔知整體連結起上來會係有幾好或者幾差。當然單就《Gears 5》而言,今集既故事推進實在係冗長!前情提要真係要剪,真係一分鐘可以講哂既野,拖左大家成十幾個鐘,真係好唔掂呢……

以上係故事方面既牢騷,畢竟佢又真係未講哂,所以唯有將佢當成係電視劇咁睇,電視劇你冇理由睇一集然後去評論佢既劇情架嘛係咪?

 

橋唔怕舊,最緊要受

其實就已經係《Gears 5》最大既優點。可能有人會覺得好可悲,但係事實上《Gears》無論係戰鬥定係畫面風格,由 Xbox 360 去到而家都冇任何既折舊。佢唔似《God Of War》甚至乎係《Super Mario》,佢唔需要特別去為左新作做非常大既改變。

畫面上,《Gears 5》已經表現上Unreal Engine 4 最強大既一面,尤其係光源同物理效果既表現上比起《Gears of War 4》唔知點解又可以更上一層樓(係Xbox One X 令到硬件效能上限提升左?)。雖然係 Xbox One X 上仍然睇到有為主機特製既像素填充,呃神騙鬼既技倆出現,但最終都出到處 4K/60FPS,算係咁。

心有餘而力不足

《Gears 5》絕對係有意學習其他遊戲加入開放世界探索元素,但佢只係開放左個地圖,冇開放到個世界。成個開放世界事件成為Gears 5 既優點,同一時間係缺點,主要係心有餘而力不足既問題。

 

 

《Gears 5》加入 Jack 既技能系統,令到玩家有進一步發展佢既需要所以被鼓勵去探索個地圖。而主角方面就用少少既遺物強力武器做利誘,吸引玩家去搵出來。咁點解主角又冇技能系統?明明只係一個單機遊戲,主角之所以係主角當然係因為佢同其他《Gears》有唔同,咁技能系統呢?

其後,果兩片開放世界既地圖都特登設定為荒漠,荒蕪到不得了。即使係有支線,你都冇任何既方法去接任(主線劇情指埋出來比你果 D 例外),甚至只係顯示係地圖或者指南針上面都冇,唯有你自己目測到,行到埋去先知係有野執或者有任務做,簡直係反智。

而且地圖上面係冇任何由敵人觸發既事件,除非你搵到敵人或者關卡既所在地,否則地圖上乜野都唔會有。與其係見到飛機既殘駭先去問控制中心係咪有跌到飛機,不如你整多少少,係主角去到地圖既某一部份,佢就成架飛機跌落來,然後直接開始打好過啦!每次去到一個建築物度都唔知點解已經被敵人築哂巢既,搵次係主角行到入去先突然有敵人係地底爆出來諗住築巢得唔得呀!

缺乏與其他角色既交流,缺乏探索地圖既輔助,缺乏同世界既互動,即係呢兩節除左係地圖大左啲之外根本就完全唔開放。尤其係好多任務都要跟次序做,咁就直頭變左做大啲既封閉地圖添!將所有既關卡連返埋一齊做單線,咁中間除左 Jack 既技能點同埋遺跡武器之外,根本就完全冇分別呀!

 

太!多!BUG!喇!

《Gears of War》系列由始至終都係用上業界最泛用既 Unreal Engine 設計,加上 Microsoft 既資金支持以及製作者可以係 Xbox 硬件上特別優化,除左多人遊戲時有機會因為連線而出現 BUG 之外,BUG 對於《Gears》系列來講根本就可以用罕見來形容,但點解今集會咁多 BUG 架!

我未知點解各大媒體都冇係評論中講述有 BUG 既問題,可能係呢個世代,有 BUG 已經係常識,冇 BUG 先係新聞。又或者佢地根本冇 BUG,只係我有問題,又唔係丫,好多人直播都睇住隻 GAME 係好多BUG 呀。又可能佢地覺得 BUG 呢 D 好快就可以整返,唔應該用來影響評分,咁你不如等人地整返好先出評論!

暫時我仲未確認到佢個 BUG 係點解會出現,因為咁多日來《Gears》同埋《The Coalition》既 Twitter 都冇相關既更新資訊。其實佢既徵狀好簡單,就係打打下既時候敵人會突然間唔出現。係本來應該有敵人既地方,甚至係 AI 隊友高呼有敵人之後,敵人仍然係冇出現。

咁會引發一連串既問題。因為 AI 既隊友係必需要等打完敵人之後先可以繼續行程,甚至乎係開門去下一個地區。而更加有部份既地圖 BOSS 戰係要等打完隻 BOSS 出左動畫之後先可以離開戰場繼續遊戲。冇敵人出現即係玩家要被逼重新讀檔甚至乎重新開GAME。

 

後面有狙擊手呀!你確認?我完全見唔到有野喎!

 

大家有冇覺得呢個徵狀似曾相識呢?係,大部份呢 D 咁既冇敵人,開唔到門既 BUG,都係《The Division 1》既時候出現過。因為《The Division 1》 (可能甚至係《2》) 都將場景內既互動元素(包括敵人既出現/死亡,部 lift 有冇掣撳)等等都同網絡連線綁埋一齊,因為遊戲本來就係長期在線既,所以理想的話唔會出問題。但如果中途斷線或者網絡有問題,咁敵人就可能唔會出現,要撳掣既地方就可能冇得撳,撳左亦可能冇反應開唔到門。

而係遊戲推出既初期,我係一次又一次係我屋企網絡連線正常既時候彈出 Xbox Live 連接中斷既通知。以此推斷的話,呢個就係問題所在,亦即係話等遊戲推出多一段時間,《Gears 5》再冇咁多人玩既候,BUG 自然會不藥而癒,又或者你冇咁唔好彩斷線既話,你係唔會知有咁既 BUG 添,所以遊戲媒體同大部份玩家冇提及過,亦係人之常情。

不過………《Gears 5》唔係長期在線遊戲來,佢開個 LOBBY 可以一個人玩,仲可以本地 COOP。有邊個咁白痴會將唔係長期在線既遊戲既程式執行綁埋落去連線度呀!

 

總結︰優敗劣勝

好既特色加得太少,而且執行既細緻程度明顯比起遊戲本身既核心要素低好多(射擊、動作同畫面)。同時因為革新遊戲系統而帶來既缺點同問題係呢個時候就會被無限放大,首次因為不知名原因而搞到《Gears》有BUG 真係不能接受(以上係推斷)

遊戲基礎分︰80

+《Gears》爛船仲有三斤釘,有畫面同埋遊戲核心既槍擊部份打底,唔衰得去邊
+開放世界部份實行上仲有好多問題未諗清楚。不完美、可接受、要改善
-人生第一次玩《Gears》遇到BUG,我服了

最終評分︰75
好彩我無論如何都會續 GAMEPASS 啫,黃金版都唔洗加錢,如果真係要俾錢買除非係趕住多人遊戲,否則唔推薦而家入手

 

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

Peter The Gamer

人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章