最近出咗一隻好正嘅橫向動作遊戲，不過香港就似乎唔太多人留意到，講緊嘅就係《Blasphemous》（褻瀆神明）。呢隻遊戲由獨立遊戲製作團隊 The Game Kitchen 製作，玩家將操作大家熟悉嘅「黑魔導」（誤），以暴力去清洗被扭曲嘅宗教世界！

一睇就知主角係遊戲王入面嘅黑魔導

《Blasphemous》故事背景講述喺一塊叫做「Cvstodia」嘅土地上，所有嘅神職人員都受到「沈默的悲傷」邪惡咀咒而墮落。而玩家則扮演被無盡嘅死亡與重生所困嘅唯一倖存者「懺悔者」（好鬼《Dark Souls》），目標就當然係打破咀咒解放世解同自己啦。

死極都死唔去

遊戲美術做得唔錯

遊戲中玩家會使用由自身罪孽所誕生嘅劍「Mea Culpa」去戰鬥，除咗有各種華麗又暴力嘅連續技，仲有極之血腥殘忍嘅終結技。攻擊以外，仲有擋格以及閃避動作，當然玩落去仲會得學新技能。另外玩家可透過獲得各種聖物、祈禱詞等去自訂自己角色，去搵出適合自己嘅戰鬥風格。

連續技頗爽，打擊感亦頗為紮實

各種終結技都好正下，殘忍得黎好有 Feel

戰鬥系統同樣設計得唔錯，並非一味齋劈

Boss 設計用心，圖為「聖嬰」

《Blasphemous》已於 2019 年 9 月 10 日推出，對應平台為 PS4／Xbox One／Nintendo Switch／PC Steam。