【遊戲新聞】《瑪利奧與路易吉 RPG》系列工作室 AlphaDream 營運困難宣佈破產

 

曾開發《瑪利奧與路易吉 RPG(マリオ&ルイージ RPG)》系列嘅日本工作室 AlphaDream 於 10 月 1 日正式向東京地方裁判所入紙申請破產,該公司截至 2018 年 3 月尾時負債額為大約 4 億 6500 萬円,去到 2018 年 6 月第 19 期結算時,純粹經濟損失(Pure Economic Loss)為 3400 萬。

AlphaDream 由前 Square Enix 員工水野哲夫以及藤岡千尋兩人以及其團隊於 2000 年 1 月組成,全力開發任天堂平台對應遊戲,包括《哈姆太郎》遊戲系列、以及較為港人熟知嘅《瑪利奧與路易吉 RPG》系列。

《瑪利奧與路易吉 RPG》系列連同重製作品,歷年來一共推出共 7 隻遊戲,喺 3DS 盛行嘅年代, AlphaDream 於 2014 年嘅年收入曾經一度超越 3 億日元,高峰時間公司有超過 50 位員工開發遊戲。

 

《瑪利奧與路易吉 RPG》七代遊戲,圖片來源@HIGO_Mario_Fan

 

不過,隨住遊戲平台重心轉移,手機遊戲冒起,AlphaDream 收入亦受到影響。佢地一度另尋發展,包括近年曾與 Sony Interactive Entertainment 合作開發小朋友向嘅手機對應益智遊戲《けだまのゴンじろー フィットエンドラン》,收入同埋口碑都唔錯,不過始終追唔上開發以及營運遊戲嘅支出,公司赤字依然嚴重,所以黎到今年踏上破產之路了。

隨住公司破產,相信《瑪利奧與路易吉 RPG》系列亦會成為絕響,加上任天堂自家亦有推出類型相近嘅《Mario》系列歷險遊戲,恐怕《瑪利奧與路易吉 RPG》會成為玩家回憶嘅一部份了。

以下為《マリオ&ルイージRPG3 DX》去年介紹影片:

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章