由真島浩所創作嘅長篇連載人氣作品《FAIRY TAIL 妖精尾巴》，喺上月就公開咗會推出同名遊戲。不過相關遊戲嘅細節就並無公開，都係唧牙膏式咁去話會有咩登場角色，對 Fans 黎講真係非常之無謂（唔通你會無納茲艾爾莎咩）。不過喺早前英國遊戲展上就正式示範實機遊玩片段，終於知道玩咩啦！

由 KOEI TECMO 製作嘅《FAIRY TAIL 妖精尾巴》，日前於英國遊戲展 EGX 2019「 PlayStation Access live stream」上展示實機遊戲玩法。

遊戲第一章由《空白の７年》開始，即係公會最強嘅「天狼組」消失七年後重歸之後嘅故事。由於最強魔導士失蹤，所以呢七年間「妖精尾巴」由大陸第一公會跌到第一百名。玩家只要接取任務並完成就可以得到經驗值令排名提升。

遊戲流程同一般 JRPG 類似，都係講野 > 收集情報 > 接任 > 城中探索 > 野外戰鬥等等。城入面會見到熟悉嘅景色，例如露西屋企下面條河、公會舊址等。戰鬥系統就出乎意料地並不是 ARPG，反而係最傳統嘅回合制 RPG。玩家喺野外地圖會見到怪物嘅身影，接觸後就會進入戰鬥，隊伍組成人數最大五人，有興趣嘅可以睇下面影片了解多啲。

《FAIRY TAIL 妖精尾巴》預計於 2020 年推出，對應平台為 PS4 / Nintendo Switch / PC Steam。