美國著名綜藝主持人（Comedian）Conan O’Brien 一直係筆者好喜愛嘅大叔之一。佢講野啜核得黎又幽默，除左會以輕鬆方式去講政治，亦會定期以佢獨有嘅吐糟風格做下遊戲試玩。

早前 Conan 去東京時拍攝佢嘅旅遊節目時，就受到小島秀夫邀請去佢嘅 Kojima Production 度作客參觀。無論你係唔係小島 Fans，相信就算只係我一個普通 Gamer，可以稍為窺探小島嘅工作室，都的確係機會難得！

大家留意架上面其中一個 figure…

本人 figure！激似樣！！

Conan 去到小島工作室都不失幽默本色，小島亦大展地主之誼，比 Conan 隊團（Team Coco）拍攝工作室內部之餘，仲邀請 Conan 去睇黎緊嘅新遊戲《Death Stranding》宣傳片。大家應該都記得首次見到個 BB 喺度轉黎轉去個畫面吧？Conan 睇完之後，忍唔住問小島一句「What’s wrong with you?」而小島就好似「計劃通」咁樣笑起黎。

如果你唔認識 Conan，可能會好好奇，點解呢個明顯唔係打開機嘅大叔，會受到小島邀請呢？事關係 Conan 其實於節目上面做遊戲試玩已經有一段時間，每逢有大作推出，唔少廠商都會搵 Conan 試玩遊戲，就係鍾意佢臨場爆肚以及新鮮嘅反應，早前《God Of War》推出前都有搵 Conan 玩架！

片段中有一部份，係男主角出場。Conan 本身與遊戲男主角演員 Norman Reedus 認識，小島笑住話，Norman 要求過遊戲中嘅自己，要做得「大隻啲」，Conan 就話，「唔怪得之，我明明見過佢唔著衫，身材邊有咁好」……

小島仲提出邀請，就係用工作室內嘅 3D Scanner 留低模組，將 Conan 變成《Death Stranding》裡面嘅神秘角色！

到底呢個角色會唔會真係出現喺遊戲入面，就留待正式版推出大家一齊探索啦。至於 Conan 今次呢條探訪影片，雖然無字幕，但係相信大家都聽得明，非常好笑（因為我鍾意 Conan 吖嘛 LOL），大家一齊黎分享。

《Death Stranding》將於 2019 年 11 月 8 日全球同步上架，繁體中文對應，PS4 平台限定。