近年台灣本土製作遊戲越發強大，除左為大家非常熟知嘅赤燭（作品：《返校》、《還願》等）以外，其實仲有唔少工作室付出大量心血去開發遊戲，既推動本土科技發展，亦藉此去宣揚台灣國家嘅特色以及文化。

《Dusk Diver 酉閃町》由網銀國際旗下 JFI Games 工作室開發，為一隻即時動作 RPG 冒險遊戲。遊戲以 UE4 開發，全 3D，主要情節全語音（日語及國語），對應平台為 PS4、Switch 以及 Steam。

故事主軸好簡單。女主角陽語默與朋友相約在西門町，卻意外捲入裂縫，去到西門町的平行異空間「酉閃町」，機緣巧合下得到力量，與眾神（遊戲中稱神界為崑崙界），去對抗想要入侵人間界嘅妖魔（遊戲中稱魔界為厄禍界）。

遊戲有趣嘅地方在於，由人設去到視覺效果都非常日系，但係用語以及環境就充滿住濃濃台灣特色，例如上面提到嘅「崑崙」「厄禍」等用字，日本以及台灣嘅特色加埋一齊，的確帶起一種格外有趣嘅化學作用。

以台灣製作嘅動作遊戲黎講，劇本簡單直接，而遊戲篇幅亦唔算長，普通遊玩的話相信 10 個鐘內已可爆機。至於戰鬥方面，即時戰鬥嘅打擊感做得頗為爽快俐落，不過怪物種類較少，難度亦偏低，出招模式為輕攻擊與重攻擊（可混合出擊），儲夠 SP 可以出大絕，整體戰鬥感覺相當有「無雙」嘅味道。

主線劇情中戰鬥都為 Normal 形式，衝過一次關之後就可以去「據點」隨時再挑戰 Hard 模式，刷關可換錢以及道具，不過遊戲裡面非常反映台灣物價，街道購物都好平 XD 食炸雞食到胃炎應該都唔會唔夠錢用，所以刷關卡嘅重要性，就視乎玩家會唔會有收集 S 評分嘅收集慾了。

呢隻遊戲推出後喺台灣國內當然係一面倒好評，畢竟國家強大了國民自然高興，不過對於喜愛到台灣旅遊嘅歐美以及日本玩家群間，亦都換黎非常唔錯嘅評價。雖然地圖只有西門町大小，篇幅亦算短，不過以首次嘗試呢種方式去製作遊戲，我說到底還是會很欣賞的。

假如大家玩過日本遊戲《Akiba’s Trip（秋葉原之旅）》而對秋葉原地理很了解的話，玩完呢隻《Dusk Diver 酉閃町》應該都可以暢行西門町無阻（笑）因為遊戲入面嘅店舖擺名以及街道模樣，都係按照西門町而家嘅模樣黎開發的（因為開發商有同西門町地區法人團體合作）

唔少香港朋友熟悉嘅品牌，例如老天祿、繼光香香雞等，亦都有遊戲進行合作聯乘，玩家可以去呢啲舖頭飲食，從而得到戰鬥加成，仲可以同店家打好關係獲得必要素材。

呢部份同《人中之龍》系列嘅飲食收集有少少似，不過《人龍》好感度夠高就係店主出黎幫你打人，《Dusk Diver 酉閃町》嘅飲食系統就比較簡單，唔會加經驗值，亦無飽腹度限制，只係會比素材你而已。

如果遊戲會打算推出續作，或者廠商計劃製作同類型遊戲，加入更多「街道」各種互動元素相信會更好玩。

至於街道有幾似？就拎西門町其中兩個地標做例子，包括捷運站對出嘅「繼光香香雞」以及中央廣場黎做個實景比較：

《Dusk Diver 酉閃町》對應 PS4、Switch 以及 PC 平台，遊戲內可選用國語／日文語音，亦可選擇界面為中文／日文。PS Store 定價為 HKD 318，Nintendo e-Shop 定價為 5,280 日元（約 HKD 370），而 Steam 版售價則為 HKD 210 。台灣本地製作誠意滿滿，有興趣嘅朋友請務必買黎玩下！