【遊戲新聞】拆晒全個地圖都得 《Chains of Fury》美漫風格破壞王明年上市

可以破壞牆壁之類場景嘅遊戲並唔係咩新鮮野,但係如果成隻 Game 入面大部份場景都可以拆晒佢又點睇?日前公佈嘅《Chains of Fury》就正正標榜遊戲中大部份場景可供破壞,而且並非單純無意義地破壞,當中可能會有謎題嘅答案隱藏住,感覺新鮮。

 

 

《Chains of Fury》屬於動作遊戲,採用第一身視點。遊戲美術風格充滿濃厚嘅美式漫畫味道,再加埋 90 年代懷舊風格,真係幾有細個超任美版 Game 味道。遊戲故事講述一個混沌嘅世界,主角曾以僱傭兵身份被雇用去做唔見得光嘅工作,然後被背叛並關進監獄,跟住就踏上復仇之路。

 

 

遊戲中超過 80% 以上嘅牆壁等場景可供破壞,基本上地圖上嘅間隔形同虛設。玩家可以破壞周遭環境進行解謎、開路前進甚至係突襲敵人等等。當然拆野過程中仲會執到相關素材,可用作強化武器之用,基本上製作團隊都係鼓勵你拆晒成個 Map。

 

 

遊戲會提供六個世界地圖,每個地圖都會有相應嘅 Boss 打。武器方面已公佈嘅有 Shotgun、機關槍、抓鉤及收縮器,順帶一題本作都頗為血腥,配合抓鉤呢類武器應該有好出色嘅表現。而本作亦都支援分割畫面多人合作遊玩,不過就無標明最多支援幾名玩家。

 

 

《Chains of Fury》預定於 2020 年 Q4 上市,對應平台為 Nintendo Switch / PC Steam。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章