如果你係《MHW》嘅 Fans，相信《Iceborne》依然係你目前熱玩遊戲首選；又，各式龍體設計精美，大家咁多年黎到底課過幾多金去入手《MH》系列模型呢？

不過，今次介紹呢個模型，有愛都未必課到金，同香港某金舖純金打造隻 Rilakkuma 一樣咁令人驚奇，事關今年係《MH》15 週年，CAPCOM 同埋日本著名首飾店 U-TREASURE 就黎左個超高價位嘅聯乘合作，推出分別以純金、白金以及純銀製作嘅金銀火龍模型！

睇完圖之後，就一齊黎睇下價錢。

「金火龍」K24 純金版本以及「銀火龍」1000 白金版本定價為880 萬日元（HKD 約 64 萬）、而兩款模型嘅「廉價版」就係用純銀 925 製作，定價為 88 萬日元（HKD 約 6 萬 4 千）；若果有朋友想同時購入「純金＋白金」版本，將會享有優惠價格 6％ off，即 1,650 萬日元（HKD 約 120 萬）。

到底會唔會有朋友想拎一層樓首期咁上下嘅錢去買兩隻 Figure，我地唔知，如果有人買左嘅好歡迎你比開箱文我地網站（喂）不過，相信大部份朋友都係「睇下就算」嘅心態架喇！我地一於去片！

即日開始，官方於秋葉原舉行嘅「DNP Produce MONSTER HUNTER × NAKED ｢モンスターハンター15周年展｣ – THE QUEST -」就會展出上面提到嘅超貴價模型，仲會有模仿遊戲場景嘅火山、雪山等共五個區域嘅 4D 體感體驗區比玩家打卡，舉辦日期由 10 月 31 日～11 月 12 日為止。如果有朋友呢段時間去東京，可以去呢度先行預購入場門票。