【遊戲新聞】兜兜轉轉決定大改 《Anthem》修復計劃竟然係變做天命?

EA 今年年初推出嘅觸目大作《Anthem》(冒險聖歌),由公佈直到正式推出前的確係破受注目,話晒有得扮 Ironman 飛黎飛去打怪係好有吸人力。但由於遊戲內容與官方所宣稱嘅有頗大分別(即係貨不對辦),導致遊戲推出後極速被大量玩家所唾棄。最大鑊嘅係負責開發嘅工作室 BioWare 有唔少成員跳船,早前連核心開發成員 Chad Robertson 亦都宣佈離職,就咁睇隻 Game 應該同死咗無分別,不過佢離職時話遊戲仍然係「值得期待」,原來有內部消息話遊戲將會有一個超巨大改變,有望返生!

 

 

外媒 Kotaku 之前曾經有文章大爆《Anthem》幕後團隊種種開發困難,例如 EA 逼佢地將未完成作品推出市面。而最近佢哋又再收到內部人士消息,透露 BioWare 將會由多間工作室聯手為《Anthem》黎個大改,而呢個大改可以稱之為《Anthem 2.0》或者《Anthem Next》。

 

實際上 BioWare 同 EA 正在研究會係通過一系列嘅更新定、大型獨立資料片又或者直頭出一隻新 Game,但無論用咩方法都好,《Anthem》遊戲系統、任務、戰利品系統、遊戲世界等等全部都會有大型變動,當中最主要嘅變動就係將整個地圖打散。因為原本《Anthem》嘅設定係一個超大型地圖,但當打散為多個區域後會減少 Bug,同時開發人員亦都更容易去開發新地區,簡單講就係將遊戲基本結構改到《Destiny》咁……諗返當初公佈時官方極之強調「我地唔係《Destiny》」,真係好鬼死諷刺。

 

 

點都好,如果 EA 透過免費更新,又或者持有《Anthem》嘅玩家可以免費升級做續集的話,相信大家都會比機會你,前提係製作團隊真係用心去搞返好隻遊戲。EA 並唔係無能力做好遊戲,最近隻《星戰》就非常出色,問題係有無心去滿足玩家,定淨係想呃玩家。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章