【試玩感想】戰棋變無雙・超簡易操作《新櫻花大戰》DEMO 版試玩速評

 

即將於 2019 年 12 月 12 日推出嘅《新櫻花大戰》自公佈以來,於 Gamer 之間討論聲音不斷,有不少朋友慕名想玩,亦有不少《櫻戰》Fans 持相反意見。遊戲早前就推出左 Demo 比玩家感受遊戲氛圍,我地就同大家分享下我地嘅感想。

要玩《新櫻花大戰》,我諗,最重要嘅係將佢當成全新 IP 咁樣去面對。因為,佢同《櫻戰》真係完全唔同嘅遊戲,以前玩文字好感攻略以及戰棋,而家係即時動態選項加埋動作遊戲,當然 SEGA 嘗試於遊戲上面作出革新,總比一直食老本好嘅……。

 

牆上佈置是令人含淚的彩蛋

 

由久保帶人老師設計嘅人設,其實問題不大,係略嫌角色感覺唔夠和風,無嗰種「大和撫子」嘅感覺。又,雖然年代為大正,不過整體人物感覺都相當現代。當然最可惜嘅係,喺遊戲裡面,人物嘅 3D 模組,面部表情以及眼睛描繪,同好多玩家事前見到嘅一樣略為生硬。

 

一開 Game 就提出可以去房間的邀請……

姐姐的肌肉好似比男主角要多,配上這種對白感覺好微妙

任何角度看依然感覺很微妙

 

不得不讚各位聲優們嘅全力演出,佢地嘅聲線真係幫遊戲生色不少,模組部份令人卻步,不過聲優們成功為角色們帶來生命力。畢竟《新櫻》喺某程度上黎講,都算係半隻後宮遊戲,要是光武變得比女主角們更可愛的話怎麼辦!

至於咩叫動態好感選項呢?今次《新櫻》入面出現嘅好感度選項,全部都有限時倒數,所以都幾考反應。為左唔想劇透未玩遊戲嘅玩家,以下選項圖我用返日文版本黎做例子。

 

 

以單純嘅攻略遊戲黎講,《新櫻》都有佢嘅樂趣,因為每個角色性別都非常鮮明,所以你必須要了解佢地,先會揀得啱「佢地啱聽」嘅對白。

例如上圖嘅庫拉麗絲,我原本以為揀個中規中距「我會努力」嘅答案一定無事,點知,原來佢嘅性格非常認真、非常唔樂觀,面對我充滿正能量嘅答案,佢大小姐表示唔高興……

選項方面係有挑戰性的,呢一點會令我有興趣去玩正式版 LOL

 

 

至於今集重要場景「大帝國劇場」整體做得正正常常,不過就未至於好細緻,例如角色衝到桌上物品唔會跌落地下,呢啲細微位就欠奉了。地圖上會顯示其他角色以及事件位置,操作無難度。

比較令我在意嘅係場景嘅比例,例如我發現去到劇場二樓,我企喺度都見唔到舞台,唔知如果觀眾黎到,坐低嘅時候可以點睇花組表演(笑)

 

 

至於頭先提過嘅「要是光武比女主角更可愛怎麼辦」……

 

 

結論係,光武模組係做得幾可愛的。不過,戰鬥模式、同埋日常模式嘅畫風同埋感覺,真係 180 度大改變,未知道正式版嘅切入點會唔會做得自然一點?

 

 

今次嘅戰鬥感覺,比較似係無雙風格嘅攻擊模式,唔同嘅係,無雙普攻用正方,但係《新櫻》普攻係圓型,再搭配三角型去作出戰技變化。於戰場上可以切換使用角色,場上有紫水晶可收集能量,能量滿左可以出超必;而衝刺唔會扣氣,跳起亦都唔會扣氣,係一個非常簡易上手嘅戰鬥系統,相信平時唔玩開動作遊戲嘅朋友,你都可以一秒變戰神。

 

衝刺唔扣氣

紫水晶儲能量

 

美中不足係戰鬥中無「格擋」選項,未知正式版會唔會喺戰鬥防禦上面作出改良?因為目前 Demo 版本戰鬥篇幅唔多,詳細戰鬥感想就留待正式版推出後再同大家分享。

《新櫻花大戰》正式版將會於 2019 年 12 月 12 日繁體中文版同步上架,目前免費 DEMO 於 PS Store 上面開放下載中。而家官方做緊活動推廣,大家玩完 Demo 版本去佢地 FB 帖文下面留言,有機會得到《新櫻》限量周邊。編輯部無份,大家有興趣嘅就唔好客氣啦:

 

 

以下為遊戲動畫版本 Opening,以及官方介紹系統影片:

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章