【遊戲新聞】《健身環大冒險》全球一環難求 任天堂因無環賣致歉

任天堂一直都好勇於嘗試新野,但係因為同朱 Sir 一樣走得太前,所以好多時新產品都係「伏」,久而久之有新品推出時大家都諗住睇定啲先。然後當啲街舖以為任天堂新作《健身環大冒險》(Ringfit Adventure)淨係可以單機玩係伏,無乜機個夠膽大手入時,佢就爆起。呢隻遊戲直頭爆到連日本都一環難求,任天堂日前就因為「無環賣」而出文向玩家致歉。

 


《健身環大冒險》簡單講就係一隻鍛練身體各部位嘅健身遊戲,遊戲種類多達六十種,而且全部經由專家指導。當中最特別嘅地方就係本作需要用隨遊戲附送配件「健身環」,基本上所有遊戲都係要靠呢個環去玩,另外有條帶比你綁隻 Joy-Con 落腳,去偵測身體嘅動作,不但係要全身運動,而且運動量的確幾勁下,成功引起一班想喺家中運動嘅玩家注意,導致全球性缺貨。(對上一隻咁勁嘅應該要數到 Wii-Fit)

 

 

由於本作口碑極佳關係,本來諗住睇定啲嘅玩家開始搶購,香港更一度炒高至 $9xx 元(原價約 $630)。日本方面自 10 月尾已經一直處於缺貨狀態,即使有新貨通知亦會喺 10 分鐘內沽清,真正一環難求。對於無環賣任天堂日前就喺官方網站中出文致歉,並承諾會加快出貨次數以供應年尾嘅搶購人潮,想喺家中運動嘅唔想食炒價就等多陣啦!

 

 

五木

動漫電玩宅,極愛金田一系列,擅長動作及策略遊戲

追蹤

更多文章