【硬件評測】市面上最好的手制 《Xbox Elite 2》接近100%完全自定

市面上專業級手制選擇不嬲唔多,不過要數當中品質最好嘅就一定有「Xbox Elite」。黎緊「Xbox Elite」將會推出新一代手制,除咗保留一代極優質手感外,仲將「自定」功能最大化,成隻手制接近 100% 可以自定,真正實現「自己手制自己 Set」呢樣野,最重要係隻制同時支援 Xbox One 同 Windows 10 平台!

 

 

「Xbox Elite 2」前面按鍵有上下左右、ABXY 八個制,上面就有 LB、RB、LT、RT 四個,背面就有 P1、P2、p3、p4 四個制,而呢堆制全部可以自由設定。當中最精彩嘅就係上下左右都可以自定,因為好多平面遊戲都無「反轉設定」呢樣野(即係上變下右變左),透過自定功能就可完美解決呢個問題。

 

背面 P1、P2、p3、p4 四個制可完全自定,以《Overwatch》為例,將按鍵設定為「跳躍」,因為玩家無需將拇指由右冬菇上移開,所以完全做到跳同時轉視角,輕鬆爬牆

用跟機程式就可以完全自定冬菇以外嘅所有制

 

玩射擊遊戲最重要嘅 LT 同 RT 制(等同 L2 R2),有得設定「鍵程」,即係按鍵由按落去果下到能夠觸發反應嘅距離,可視之為按鍵嘅靈敏度,而「Xbox Elite 2」罕見地設有三段鍵程調教,比坊間專業級手制再多一段。

當玩 FPS 類型遊戲對槍時可謂分秒必爭,將鍵程 Set 度最短減低觸發開槍時間,另外仲可以透過 Xbox 附件應用程式來調整觸發盲區(deadzone),進一步加快開槍速度。千其唔好睇少「減低開槍觸發時間」重要性,當玩 FPS / 格鬥遊戲時,好多時就係輸果少少。

 

圖示係中段鍵程,無需撳到落低先有反應,加快開槍速度

 

跟住落黎呢樣就係點解「Xbox Elite 2」會係現時市面上最好手制嘅致勝元素,就係手制上二粒冬菇係可以自定阻力!相信絕大部份嘅玩家用手制時總會有「冬菇好鬆 / 緊」嘅感覺,但係因為無得自己設定阻力,唯有硬食。但係「Xbox Elite 2」終於解決呢個問題,每粒冬菇有三段阻力供玩家自行調教,並且設有多種冬菇頭設換,其中一款仲要係高身冬菇頭,更換後拇指會處於較高位置,可進行更精準操控。

 

每個制都會跟支批比脷,只要拎起粒冬菇就會見到阻力調教

仲有其他「菇頭」揀,圖中左邊冬菇用咗高身版,比右邊正常版起碼長一倍

「Xbox Elite 2」中間呢粒制係用黎切換手制設定,玩家可儲存最多三個訂設定檔同一個預設設定檔,撳一下就可以快速切換。

 

最後要一提嘅就係裝手制個盒,今次終於唔係得個樣!只要再插線落個盒度隻制就會叉電,而隻制只係「放」喺個盒入面,唔洗插線的,避免經常拔插導致充電位損壞問題(我起碼有三隻制係因為咁壞)

 

插盒外面就叉到電

其他配件妥善儲存

 

「Xbox Elite 2」無線控制器,將於 12 月 24 日上市,手制同時支援 Xbox One 及 Windows 10 平台,對自己好啲,聖誕買隻用吧,真心推薦!

五木

五木 動漫電玩宅,極愛金田一系列,擅長動作及策略遊戲

追蹤

更多文章