多數人鍾意過年熱熱鬧鬧成班人倒數，亦都有人想自己一個靜靜地咁過。針對想靜靜地贏嘅朋友，就有人開發《跨年模擬器 2020》，即使只有自己都可以安坐家中享受節日氣氛，唔洗同人逼真係贏在起跑線！

《跨年模擬器 2020》（New Year’s Eve 2020）係至今為止僅有嘅實時跨年模擬遊戲，佢會根據你電腦入面嘅時鐘自動運行，去到 12 月 31 日時鐘會開始倒數，並且於畫面中出現各種令人更心酸嘅問題。即係「來年你有咩打算？」、「今年仲有咩未完成？」呢類野，真係諗起都傷心。不過當你捱到去最後倒數時，就會有精彩嘅個人煙花 Show 做安慰獎。

如果喺 12 月 31 日之前開模擬器的話，就會見到一個倒數時鐘同埋極之逼真嘅天氣模擬畫面，配合鋼琴聲，聲稱可幫助玩家釋放壓力。另外官方話喺聖誕節會加入「特別內容」，如果特別到唱「我好慘我好很慘無聖誕節」咁就 fit 晒啦！

《跨年模擬器 2020》已經有得買，不過要注意呢個模擬器係有時效的，只要時間過咗 2019 年程式就會停止運行。當然你可以手動較電腦個時間令佢再次運行，但係咁樣有意義嗎…….