【遊戲新聞】《FF 15》即將推出 MMORPG 手機遊戲,不過係中國製你又想唔想玩?

 

於 2016 年 11 月推出嘅《Final Fantasy XV》雖然口碑一般,不過精美嘅世界觀同埋人設,都仲係令到遊戲有唔少熱心嘅支持者。

事隔幾年,《FF15》又有新動向,不過就唔係 DLC,而再次係推出手機遊戲,今次仲要係出 MMORPG,不過隻 Game 就唔係 Square Enix 直營,而係由中國「GAEA」以及韓國「JSC」共同製作,中國遊戲商「上海東方明珠」發行,遊戲將沿用舊有《FF15》角色同世界觀,不過就會再加一堆新嘅原創角色落去咁話。

 

 

日本廠商允許中國遊戲商購入自家遊戲版權都唔係新鮮事,相信近年大家都會聽到唔少類似消息。今次呢個 MMORPG 將以 UE4 開發,以單純手指點擊去模仿《FF15》遊戲裡面嘅戰鬥,開發商話有信心帶來同樣嘅爽快感咁話。故事以王子開始旅行為大綱,然後展開拯救世界之旅,預計大部份原作角色都會登場,不過會加入新地點以及新角色。

 

 

開發商話呢隻 MMORPG 將會先行於中國市場上架,之後會再推向國際,不過就未交代亞洲區嘅伺服器會點樣分配,如果中港台服擺埋一齊嘅,相信 Chat Room 嘅戰事會比遊戲嘅戰鬥更為激烈。

不過,大前題係,你會唔會有興趣玩呢?

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章