【玩物推介】全本土製作! 新年合家歡桌遊推介!

農曆新年假期就到,團拜聯誼就一定有,一班朋友上到嚟唔想淨係打機嘅話,不如試下啲簡單易上手又好玩嘅 Board Game。以下幾款 Board Game都係由香港團隊 Jiuga Games 負責,每隻 Board Game 受眾各有不同,要靜靜地思考嘅又有、一齊熱熱鬧鬧嘅亦有,依家我地逐隻同大家介紹下。

全家覆

呢隻《全家覆》玩法好簡單,個玩家喺堆「表情符號牌」當中隨機抽 5 張,再抽出張「meme圖」去作為預設回應,玩家就要用手上 5 張「表情符號牌」作一個故事去配合「meme圖」嘅回應,所有玩家講完故事後就互相投票, 3 Round 最高票數嘅玩家就係勝利者。啱晒一班多野講或者咀賤朋友玩,運用一少少創作力,隨時笑死全場人。

「外星人唱歌襲地球」定係「拒絕美女邀請食鮑魚」,邊個短故事最配合「食_啦你」呢個meme圖回應呢?

仲有進階玩法,每人抽一個身份去喺講故事之前發動「身份技能」 p.s. 姐夫真係慘XD

貓之築地

貓之築地》淨係睇設計已經心得貓奴們大愛,而且玩法非常簡單。簡單講解就係首先要戴上「貓爪指套」,每次喺枱面上隨機放有 5 箱魚,每次倒數三聲之後,玩家就要「指」出決定拎走邊箱歸自己。如果同時有兩位或以上玩家揀選同一箱的話,嗰箱魚就作廢。只要有玩家最先拎到兩款不同魚類(各3箱),即結束該局遊戲,並跟據「魚牌」計分,然後重新洗牌再開局,總計拎到 8 分嘅就係贏家。

睇落好易玩呢?!

有啲玩家鍾意「出口術」嘅話,就好容易搞到大家「撞機」

勇闖51 區

如果大家留意過啲國際趣聞,上年六月有個美國大學生講笑式搞左個「Storm Area 51, They Can’t Stop All of Us」嘅活動,叫 UFO 迷一齊勇闖內華達州嘅神秘軍事區域「51 區 (Area 51)」 ,而《勇闖51 區》呢隻 Game 嘅概念就係喺自呢件事件。

玩家們先決定邊個做特工,而其餘嘅玩家就成為入侵者。做得特工就要一個對多個入侵者特工要使用手牌去阻止入侵者到達禁區之餘同時要令入侵者士氣崩潰。而入侵者玩家當然要用盡方法去到禁區位置,不過就唔可以同其他入侵者商討策略,所以呢隻《勇闖51 區》最啱啲靜靜地思考嘅玩家群。

卡牌設計都非常有創意

對牌之下,雙方會出咩招呢?

入侵者完全防禦!

Slime Frontier

最後呢隻《Slime Frontier》都係隻唔洗溝通,玩家自己做自己野嘅策略遊戲。最多可以支援 6 個玩家《Slime Frontier》睇落好多牌,但非常之容易上手。

玩家以收集「資源」去取有戰鬥力嘅「精靈」去攻擊「魔龍軍團」而獲取分數,最先得到 25 分嘅玩家成為冠軍。不過大家要記住,魔龍會喺指定嘅回合攻擊玩家,所以除左攻擊之外,仲要好好做足防禦準備,唔係嘅話好快比其他玩家後來居上。

儲夠戰力打完「魔龍軍團」仲要消耗一隻「精靈」同所有「武器」,所以分數都唔係易得到架!


如果大家睇完我地介紹都仲想試下先的話,可以趁依家到 2 月 16 號去到銅鑼灣皇室堡 1 樓嘅 Pop-Up Store 度試玩。現場仲有其他款色嘅 Board Game 比大家選購之外,仲有專人講解介紹。所以想新年有啲新野玩嘅話,大家記得去皇室堡 1 樓嘅 Pop-Up Store 睇睇啦!

如果唔想諗咁多直接買返屋企的話,亦可以上 Jiuga Games 嘅網店選購。

地點:銅鑼灣 皇室堡 1/F
時間:星期一至五(2:00pm~9:00pm)
星期六、日及公眾假期(12:00pm~9:00pm)
*初一至初四 (25~28/1) 休息

 

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast //goo.gl/HRnxDW

追蹤

更多文章