【遊戲介紹】日本便利店返夜更的恐怖體驗《夜勤事件》日系恐怖即日上架

 

相信大家去日本都一定會去便利店掃宵夜,而日本獨立遊戲工作室 Chilla’s Art 就以日本夜晚嘅便利店作為舞台,製作名為《夜勤事件》嘅恐怖遊戲,2020 年 2 月 18 日上架,對應平台為 Steam,定價 HKD 18;官方仲建議玩家要戴上 Headset 進行遊戲咁話。

 

 

玩家於《夜勤事件》裡面,飾演女子大學生,一個人居住於小鎮裡的古舊公寓,夜晚要到附近嘅便利店做兼職。除左每日要處理過期食品之外,亦會面對各式各樣嘅麻煩客人。

但係,最奇怪嘅地方,係喺便利店遇到嘅某啲事件……。

 

 

遊戲以 VHS 膠卷風格去表現畫面,於聲效以及場景上落足心機營造氣氛;雖然《夜勤事件》係一隻平價小遊戲,不過篇幅並唔馬虎,預計正常遊玩時間為 40 分鐘,並有兩個故事結局,有興趣嘅玩家可以到 Steam 購買頁入手。

 

 

P.S. Chilla’s Art 喺日本頗有名氣,因為佢地擅長以日本都會恐怖題材製作遊戲,例如係福岡縣宮若市出哂名嘅恐怖隧道為主題嘅《犬鳴トンネル》、以出過人命嘅房地產作為主題嘅《事故物件》等等,大多都於玩家群中獲得好評,鍾意玩日式恐怖遊戲嘅朋友不妨留意。

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章