【影視感想】《超音鼠大電影》頭5分鐘極速觸動你回憶


同你講個故仔:一隻跑得好快嘅藍色刺蝟,意外跌落人類世界,然後比個邪惡博士追殺,完!呢個咁嘅故仔,你會唔會入場睇?因為以下三個字,我會:「超音鼠」!

「超音鼠」對於 70、80 後玩家黎講絕對唔陌生,當年任天堂有《瑪莉奧》,世嘉就有《超音鼠》,兩大遊戲機廠競爭激烈,我細過就係兩者之間,揀咗世嘉做第一部主機,亦被呢個藍色波深深吸引,富有速度感嘅遊戲畫面,亦迷到全世界玩家,所以對今次超音鼠跑到大銀幕,本人極之期待。

雖然睇第一條 Trailer 真係嚇到想扔爛 Mon,但電影公司掌握致勝之道,就係「聽民意」,重新製作超音鼠嘅設計同動作,雖然要增加成本及延遲上映,但「聽民意」從來都唔會輸,最後《超音鼠大電影》票房贏咗同期電影《 猛禽小隊:小丑女大解放》,第四日以 7,000 萬美元贏埋一樣都係遊戲改編真人電影《神探 Pikachu》,而且仲感動我呢位小 fans。

前後對比好大

《超音鼠大電影(Sonic the Hedgehog)》不拆不扣係一套 Fans 向嘅電影作品,故仔都用咗 3 句話咗比大家聽,無返咁上下情懷同回憶,的確難以享受箇中樂趣。

電影一開頭已經極速以聲畫打動你心底嘅回憶,從世嘉 Logo 出現、以及世嘉經典遊戲畫面,再加上「se~ga」嘅音效已經足以令機迷「毛管戙」,隨後見到超音鼠第一集第一關嘅環境,兒時回憶返哂黎,再出現「神秘角色」,已經覺得今次改篇得好有 Heart!

呢張圖有聲

好啦,劇透到呢到為止,而今次電影有好多 Fans 先睇得明嘅彩蛋,大家真係要落足眼力。

遊戲改篇真係唔係齣齣好睇,將遊戲世界帶落真實世界相當有難度,太忠於就無驚喜,改太多就比 Fans 鬧爆,相當難拿捏。今次《超音鼠大電影》做得非常之好,導演捉到呢隻遊戲嘅獨特之處,亦花心思將遊戲原素真實化。

例如超音鼠被敵人打中會跌 Ring ,但又可以即時執返,尾場打大佬嘅方法忠實呈視得黎,又唔會「搬字過紙」,適當地加返原著音效,恰到好處,非常值得一讚。

《超音鼠大電影》故仔方面其實相當薄弱,但亦帶出超音鼠嘅孤獨,係遊戲世界的確好少講及呢一點。故仔薄弱亦有大星搭救,今次搵黎占基利(Jim Carrey)飾演 Dr. Ivo Robotnik(Doctor Eggman),已經好耐無係大銀幕睇返一個好癲喪嘅占基利,今次「占基利式」嘅演出同 Doctor Eggman 非常夾,完美地演繹出 Doctor Eggman 果種自傲邪惡嘅感覺。

整齣笑點亦唔少,唔打過隻 Game 都識笑,一套合家歡嘅電影,唔會悶親女朋友。

作為 Fans 向嘅電影,《超音鼠大電影》交足功課,Fans 都應該會收貨,我亦覺得導演好有心思,最深刻係超音鼠拎住隻龜跑,又提及超音鼠好憎另一個「蘑菇世界」,不禁諗起任天堂嘅《瑪莉奧》,機迷一定會心微笑。

好難唔諗起呢位大叔

《超音鼠大電影》完全令我諗返起兒時玩超音鼠遊戲嘅回憶,睇完有即刻想玩返遊戲嘅感覺,做到呢點已經非常成功。提少少,今次電影尾 Credit 做得好有心思,仲有驚喜人物出現,記得睇埋先好走。

5分滿分我比5分

艾力

艾力 幪面超人頭號粉絲,玩具figure 無一不歡,極喜歡玩潛入式遊戲。怎吃也不胖,只因最喜歡「食字」﹗人生座右銘是「自作樂,很快樂」。

追蹤

更多文章