【遊戲新聞】極好評 Cyberpunk 遊戲 《Ruiner》NS 上展開血腥暴力之路

早幾年曾經出咗隻頗為出色嘅遊戲《Ruiner》,遊戲中所呈現嘅 Cyberpunk 世界備受玩家讚賞。日前製作團隊 Reikon Games 宣布,會將遊戲移植至 Nintendo Switch 上,鍾意 Cyberpunk 風格嘅朋友絕對要留意啦!

 

 

《Ruiner》最初於 2017 年 9 月推出,現時有 PS4 / Xbox One / PC 版本。遊戲屬於動作射擊遊戲,採用俯瞰式視點。遊戲舞台位於 2091 年岭谷市,玩家所扮演嘅主角慘遭駭客陷害,並且自己細佬仲比人捉埋,為咗復仇+救人主角踏上廝殺之旅。

 

 

遊戲自 2017 年推出後,當中嘅美術、音樂以及玩法持續得到玩家嘅「極度好評」,特別係戰鬥系統都做得非常特別。

除咗最基本嘅槍械以及近戰武器外,亦有時興嘅「處決」。不過本作嘅「處決」並唔係得個型字,仲會 Buff 角色一段時間,有實際價值。另外因為主角只係一個「人」,所以都係正面比人啪幾槍就 ByeBye,所以要依賴遊戲中嘅核心系統「Whack Dash」,簡單講即係「Bullet Time」+多重快速移動,而呢個系統係出奇地有趣。

 

 

《Ruiner》現時著力於 UI 以及操控等各方面為 Switch 進行調整,當然推出時亦會包含所有嘅更新內容。現時尚未有遊戲正式推出時間,而官方 Twitter 用一個非常有趣嘅方式「01010011 01001111 01001111 01001110」去同大家暗示,經解密後解作「Soon」,相信等多陣就有得玩,順帶一提本作現時已有對應繁體中文,相信 NS 版都唔例外。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章