【遊戲感想】完美破舊立新!演繹摩登 RPG《人中之龍 7》劇本有情有義有溫度極推薦

 

前言好簡單直接:《人中之龍 7 光與暗的去向》,非常好玩,非常推薦比各位玩家。

我係《人龍》系列嘅 Fans,每一集都有玩,連《Of The End》都有玩埋,桐生、真島、堂島一行人,絕對係陪住我成長。所以,喺《人中之龍 7》剛剛公佈初期,我一度反感,甚至講過「換主角我唔玩!」「無左桐生仲點叫人龍!」等等非常晦氣兼先入為主嘅說話。

 

 

對於遊戲剛剛宣佈玩法由動作變成 RPG,相信亦有唔少玩家同我一樣,「變左 RPG 仲點會係人龍!」「咁樣一定唔好玩!」之類嘅意見此起彼落。直至我玩左《人龍 7》嘅 Demo 版本,我開始有少少改觀,遊戲比我想像中吸引。

 

 

將《人龍 7》深深切切地玩過一遍之後,我終於明白,《人龍 7》就算主角變成春日一番一行人,玩法由動作變成 RPG,不過,骨子裡還是《人龍》,那份忠義,江湖黑道的複雜情感,故事濃厚的人性,全部,都是《人龍》歷年來帶給玩家的意義。

 

 

人生總有高低起伏,不過跌落人生最低處,不代表一沉百踩,而是代表,你有更多的空間可以向上爬,可以重新開始;重點是,你要先肯定自己的價值。

春日一番,作為前黑道、不學無術、出身不良、仲坐過監,這樣的一個人,在現今社會,大概一點價值也沒有。但是,他成功靠一雙手,由流落街頭的街友,慢慢向上爬,憑住自己的獨特個性,把伙伴吸引到自己身邊。

 

玩到呢幕有啲肚餓

 

《人龍 7》是一個非常勉勵人心的故事,劇本寫得極為出色,便當發得一點都不手軟(喂),而東城會裡眾多玩家熟悉的角色們,亦以非常完美的切入點,重回到玩家的面前。

 

 

《人龍 7》與我地以前玩開嘅《人龍 1~6》代係相同世界觀、相同時間線,只係當時大家係以東城會及桐生一馬嘅角度去推進遊戲。

而喺城市嘅另一邊,有個名為春日一番的小混混,其實同樣努力地生活著、坐了冤獄、中了一槍、流落異人町、然後發現一切都是冥冥中的安排、從而發現黑道與政治上面的勾結……

最後,桐生一行人,與春日一行人的時間線,終於碰上了。眾人相遇的劇本部份,編排得合理而精彩,對於我呢個 Fans 而言,激動得起了滿身雞皮。

 

 

對於香港玩家黎講,遊戲中有幾個設定,絕對係份外有共鳴。你可能會話「車,警黑勾結係眾所周知嘅事,有咩咁特別」,特別係在於,《人龍 7》裡面嘅黑勢力,最鍾意就係著住白色 T-Shirt 去打人。

嗱,遊戲設定黎架咋,唔係我老屈架。

 

仲有韓仔戴黑色口罩:「你唔戴口罩!你係咪鬼!」

 

當然遊戲系統變成 RPG 形式,我的確花了點時間去適應,不過轉職系統其實幾符合春日一番嘅「勇者 RPG」設定,玩落都有趣味的。

同時,職種變化同我地玩開嘅 RPG 唔同,唔再係單純嘅騎士、法師,而係跟足 2020 年代標準,由廚師、街頭舞者,去到唔多唔少帶住江湖色彩嘅黑手黨、媽媽生等等職業,呢一點我覺得《人龍 7》有成功地將 RPG 摩登化,亦有一定幽默感。

 

 

同埋,啲敵人真係乜野種類都有,淨係街友都有分幾種,仲有大量痴線佬,官方絕對係擺左大量心機,去設計敵我雙方嘅攻擊模式。

 

打挖土機………

 

我身邊有唔少朋友係經《人龍 7》而第一次入坑,而對於我呢個 Fans 黎講,遊戲中當然亦包含左唔少「舊玩家可以會心微笑」嘅小元素。

例如當年韓流興起,韓劇《冬日戀曲》於日本熱播,於是於《人龍》裡面,出現嘅假裴勇俊「幻尹大人」。黎到 2020 年嘅今日,韓劇於日本影響力降低返,「幻尹大人」再度以落泊形象登場。見到佢成為外派角色登場嘅超必,我每次睇都笑好耐……。

 

 

其次仲有,雖然今次主要版圖為「橫濱 異人町」,不過,舊玩家熟悉嘅「神室町」同埋「蒼天崛」都仲係保留部份玩素供玩家探索;見到風景依舊,但人面全非,心情係「嘩原來我都玩左好多年《人龍》(誤)」。

 

橫濱極靚

神室町嘅回憶之一

 

至於《人龍 7》今次新增小遊戲「執空罐」同埋「Dragon Kart」,或者會勾起唔少 7、80 後玩家嘅回憶。「執空罐」係向《Pac-Man》致敬,而「Dragon Kart」擺明就係向《Mario Kart》取材;加上一番童年開心嘅回憶,就係打《勇者鬥惡龍》,真係 SEGA 向其他遊戲廠家示好嘅良好體現(喂)

 

 

原創遊戲「大海原證書」以及「一番製果」亦都好好玩,經營系遊戲已經成為《人龍》必備嘅元素之一了……

 

大海原證書學校合格畫面:個印係唔係向《MH》致敬?

多謝公司定期派三百萬比我!!!

 

而正因為遊戲中有大量取材至現實嘅題材,《人龍 7》整體感覺,非常貼地,非常真實,亦令到玩家更易投入到故事裡面。

 

《流星花園》道明寺嘅對白 LOL!!

 

我必須要再次稱讚,《人龍 7》劇本寫得非常出色。當然,夾硬要搵嘅話,劇本多多少少有一定犯駁位,不過並唔算係令人覺得「玩唔落去」嘅程度;反而係人情、人性方面嘅描寫,某幾段劇情,某幾個便當,都令我唔爭氣地眼濕濕。

 

 

希望大家都同我一樣,會喺《人龍 7》嘅故事裡面,搵返一啲隨住成長就遺忘左嘅信念、或者係改變左嘅價值觀,亦都可以得到勇氣,因為生活喺現代社會,太多不公,太多遺憾,而人,係無可能獨自一人地永遠堅強下去的。

同伴好緊要,《人龍 7》裡春日一行人嘅關係,絕對係見證左「兄弟爬山,齊上齊落」。

 

 

如果你未玩過《人龍 7》,又或者只係玩過《人龍 7》嘅 Demo 版,就斷言佢「唔好玩」「改變得唔好」嘅玩家,去到本文最尾,我都係希望你可以比一次機會佢,試下感受隻遊戲。《人龍》系列運行左咁耐,其實遊戲都好需要革新,而開發團隊的確擺左極多心機落《人龍 7》裡面,處處都是心思。

 

 

對我黎講,點為止叫一隻好玩嘅 RPG?其中一個辨識方法,就係我捨唔捨得爆機,同埋,爆機之後,個心,會唔會感到寂寞同空虛。

《人龍 7》爆機後,我係有咁嘅感覺的。多謝春日一番一行人陪伴我嘅呢一段時光,多謝製作團隊整左一隻咁精彩嘅遊戲;亦因為如此,《人龍 8》會叫我相當期待。

 

 

《人中之龍 7 光與暗的去向》繁體中文版已經於 2020 年 1 月 16 日上架,付費 DLC 嘅「惡魔」及「大姐頭」兩個新職種初期已有範圍攻擊,有興趣嘅玩家記得一併收藏埋。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章