【遊戲新聞】末日生存動作遊戲《Zhelter》 耕田殺喪屍缺一不可

打喪屍遊戲大家一定玩過,但係通常都係 3D 立體動作遊戲,平面嘅喪屍遊戲不嬲都唔太多,再加埋要耕田嘅就更加旱見。最近就有隻結合喪屍生存同耕田嘅遊戲《Zhelter》(防僵屍基地),喺 Indiegogo 平台進行集資,並且於三月比集資者進行搶先體驗。

 

 

《Zhelter》由韓國團隊 G1 Playground 開發,使用 Pixel Art 風格,屬於 2D 動作生存遊戲,只支援單人遊玩。遊戲故事都係講你係末日死淨種,點樣喺呢個世界生存果類野。同其他喪屍遊戲類似,玩家由基地出發,進入滿佈喪屍嘅區域尋找資源及拯救生還者,然後升級裝備同基地設施,即係類似《State of Decay》咁玩。

 

 

咁當然動作遊戲最重要都係睇個戰鬥系統,本作嘅戰鬥極之流暢,射擊感亦夠,玩法就類似 SNK《Shock Troopers》。而且喪屍移動速極高,仲有機會遇到強力嘅巨型 Boss,難度唔低之餘亦都幾刺激,令人滿意。

 

 

戰鬥以外本作另一特色就係「模擬農場」,玩家喺外面收集返黎嘅資源,可以用黎加工做出各種物品,例如幫你抵檔喪屍入侵嘅「欄柵」、「石斧」等工具。如果厭倦打打殺殺的話亦可以選擇係基地入面做個農夫,種植各種食物以供應基地各人員所需,而且根據官方描述耕田係需要時間同精神打理的,相應亦有可觀嘅報酬。

 

 

《Zhelter》預計今年 6 月進行搶先體驗,暫時只有 PC Steam 版本,對應繁體中文。

 

 

五木

五木 動漫電玩宅,極愛金田一系列,擅長動作及策略遊戲

追蹤

更多文章