【遊戲新聞】《大逆轉裁判》製作人児玉真佑宣佈退社 Capcom

 

於 Capcom 任職多年嘅製作人児玉真佑先生,日前喺 Twitter 上面分享自己離職嘅消息。児玉真佑先生表示,自己於 2020 年 2 月尾嘅時候已經離開 Capcom,離職原因為「將會接受新嘅挑戰」,但係就未交代自己新任職或者新企劃方面嘅資訊。

 

 

児玉真佑先生曾任《流星洛克人(流星のロックマ)》系列、《大逆轉裁判》系列嘅製作人,同時亦負責監修 2019 年發售嘅移植版《逆轉裁判 123 成步堂 Collection》呢套復刻作品。

佢早在 2004 年代已經加入 Capcom,曾協助《CAPCOM FIGHTING Jam》及《Mega Man Battle Network 6》等遊戲企劃,可以話係 Capcom 社內非常活躍嘅人員之一。

 

 

雖然今次佢未交代自己未來去向,不過佢就寄語玩家,希望大家可以繼續支持往後嘅《逆轉裁判》作品,而自己呢個 Twitter 帳戶,則會繼續分享佢嘅愛貓以及佢最愛嘅咖哩,都希望玩家可以繼續守望佢未來嘅工作。

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章