【遊戲新聞】新式高速卡牌Battle RPG 《Dimension Reign》超爽快戰鬥系統極之上癮

近年雖然越黎越多卡牌遊戲興起,但係整個遊玩過程都係思考嘅時間居多,好少話會有「爽快」感。不過《Dimension Reign》呢隻作品就打破固有框框,用卡牌型式黎玩 RPG,而且整個戰鬥系統係極之「爽快」,玩起上黎真係極之上癮!

 

 

《Dimension Reign》由 ScopeNext 開發,屬於策略角色扮演遊戲。玩家需要控制我方二位角色,通過技能以及攻擊組合黎擊敗敵人。本作最獨特嘅地方係佢嘅戰鬥系統,我方基本行動回數只有 2回,但玩家可透過各種卡牌連擊做成 Chain,當摧毀敵人 HP 條就可以獲得「Break Chain Attack」,喺呢個狀態下攻擊力會獲得加成以及增加攻擊次數,而且更可以打暈敵人硬 Cut 佢個 Turn,由於節奏明快所以整體感覺都好爽下。

 

 

而玩家需要透過升級及組合天賦獲得新嘅卡牌點以及技能,而每種卡又會對應各自屬性及能力,攻擊範圍亦有分單體、範圍及全體攻擊。又因為升級之後有新卡新技新 Chain,所以要不停試新組合去達成最佳效果。

 

 

《Dimension Reign》已於 3 月 19 日推出,26 日前購買可享 10% 折扣,盛惠 HKD $77.4,暫時只有 PC Steam 版本。

五木

五木 動漫電玩宅,極愛金田一系列,擅長動作及策略遊戲

追蹤

更多文章