【遊戲新聞】「羊命召喚」血腥互殺 《Goat of Duty》限時免費回歸最原始玩法

之前隻《Goat Simulator》比玩家做隻山羊享受盡情破壞世界嘅快感,如果要更上一層樓可以點玩?答案可能係今次介紹嘅《Goat of Duty》。喺呢隻遊戲入面,玩家同樣地扮演山羊,不過唯一嘅目的就係殺戮!

 

 

《Goat of Duty》由意大利獨立工作室 34BigThings srl 開發,採用第一身視點,類型係傳統射擊遊戲。遊戲背景設定過癮,官方介紹係咁「因為一場核爆,導致山羊們突變性擁有高等智慧,並且向人類反擊……等等,再黎過。山羊們有一開始已經好聰明,不過因為無手指,所以耐心地等待人類開發全自動機械裝置,從而……。都係再黎過。係宇宙嘅另一邊,山羊係最強大嘅戰士!就決定係咁!」……以上係官方嘅遊戲背景說明……心諗乜料…..。

 

 

至於遊戲玩法,就係最基本嘅射擊遊戲,無戰術唔洗練角,基本上見羊就殺就 OK,亦即係回歸返最原始嘅玩法。包含四種模式,例如經典模式,最多支援 10 人嘅多人大亂鬥等等,不過最好玩都係推羊模式,可以係咁撞人落街好鬼過癮!

 

 

《Goat of Duty》現時做緊抗疫活動,只要限時內登入 Steam 就可以免費下載,呢個活動做到 4 月 1 日,同時團隊亦都呼籲玩家#StayAtHome,真係好有心。

五木

五木 動漫電玩宅,極愛金田一系列,擅長動作及策略遊戲

追蹤

更多文章