【玩物花絮】完全變型合體 LEGO《雷霆煞星》渦輪機械人

講日本特攝戰隊劇集,最多人識嘅一定係《恐龍戰隊》。但我地呢啲三字頭大叔,大部份第一套接觸嘅日本特攝戰隊片應該都係《高速戰隊渦輪連者(港譯:雷霆煞星)》。

雖然近年笨大嘅 Super Minipla 系列都高質素重製好多嘅戰隊機械人,但《高速戰隊渦輪連者》連模版都仲未見到官方有公佈,舊產品 DX超合金又難追嘅時候,又有 LEGO 達人忍唔住,決心自組一隻劇中嘅渦輪機械人

 

Kousoku Sentai Turboranger 高速戦隊ターボレンジャー Turbo Robo ターボロボ by Tung Le9 阿董

《高速戰隊渦輪連者》呢隻渦輪機械人,係由五架不同款式嘅汽車合體而成。

藍色嘅 Turbo Jeep ターボジープ 同埋黃色嘅 Turbo Buggy ターボバギー就組成左右腳掌

白色嘅 Turbo Wagon ターボワゴン就係小腿部份

黑色 Turbo Truck ターボトラック 就係大腿、腰腹同手臂

紅色 Turbo GT ターボGT 就係頭部同胸部

合体シフト・ターボロボ!

Turbo Cannon ターボカノン

Turbo Crush 高速剣ターボクラッシ

以當年嘅DX超合金去做藍本,唔需要換件/拆件就可以完全變型合體,而且活動性比起好多嘅渦輪機械人都高,不過其實佢只係 25 cm 高,唔係想像中咁大隻。

如果對阿董比較有印像嘅作品,應該會係佢一系列嘅《高智能方程式》系列賽車。但其實佢一直都有製作不同類型嘅 LEGO 機械人作品,不過變型合體嘅就真係佢首次嘗試挑戰。

 

 

細個買唔起,大個高價唔想追,作為一個 LEGO MOCer 就只好用自己方法去實現自己嘅兒時夢想。「用LEGO黎砌返細個得唔到既野,而且 LEGO 始終唔係現成玩具,有限制,但呢種限制都係佢好玩既地方」佢話五架車當中最難搞就係Turbo GT,「紅車合黑車個連接位真係試到我喊」如果大家留意的話,其實架Turbo GT前轆係冇車軚架!「前碌無辦法之下就無軚,要就到人形同車形拎到平衡」,阿董佢比大家嘅心得就係要懂得「取捨」。

 

 

最後我都問過阿董,會唔會將渦輪機械人擺上 LEGO Ideas 度,等 Fans 投票成為官方產品,可惜佢就暫時未有呢個打算。阿董仲有唔同嘅作品會喺佢嘅 Facebook 個人作品 Page 度同大家分享,想睇多啲嘅話,可以去下面嘅傳送門入去睇睇!

 

Tung Le9 阿董個人作品 Facebook Page 傳送門

 

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章