【遊戲新聞】遊戲界瀨尿牛丸 《Black Survival: Eternal Return》英雄聯盟溝食雞明天封測

飲食界嘅「瀨尿牛丸」聞名天下,咁遊戲界嘅大熱作品溝埋又點呢?答案可能就係呢隻《Black Survival: Eternal Return》。遊戲由韓國團隊 Nimble Neuron 開發,而呢隻遊戲嘅內容簡2單講就係將二隻大熱遊戲《英雄聯盟》(LOL)同《PUBG》(食雞)溝埋一齊,真係齋睇都覺得好玩!

 

 

《Black Survival: Eternal Return》採用《英雄聯盟》式俯瞰視點,而玩法就同《PUBG》一樣,以成為島上最後生存者為目標,遊戲最大支援 15 人對戰。遊戲暫時有 8 位角色選擇,角色系統就同 LOL 差唔多,每隻角都有自己攻擊方式、技能、屬性,而每次升級都會有一點技能點供玩家升級技能,玩家可自由選擇升咩技先,當然大技亦都包含在內。另外戰鬥系統亦有 LOL 嘅影子,包括喺草叢伏擊敵人、技能位移、走位、計算對方血量等等,有相關經驗嘅玩家好快就可以上手。

 

草叢伏擊又點會無

方向指定技要預判敵人走位

 

當然想贏並唔係操作技巧好就得,係呢隻遊戲入面所有玩家初始都係垃圾裝起手,裝備分為 武器、衣服、頭盔、手部、鞋子、飾品等等,玩家必須收集材料製作同合成升級裝備,以此提升攻擊力、生命、攻擊速度等屬性。同時每件裝備仲有稀有度之差,高等嘅裝備仲要搶稀有材料進行合成,而呢啲材料就要透過打怪或者空投箱(同食雞一樣每過一段時間就會空投補給品進場)等方式取得。

 

升裝要資源,而呢啲資源有限咩地區獲得

 

食雞入面著名嘅「縮圈」(即每過一段時間就會縮少可行動範圍)系統係本作中同樣存在,而每種裝備所需嘅素材亦有限制不同區域。玩家唔再單純地再係時限內前往安全區,仲要考慮係該區並未成為限制區前衝過去探索,定係預先埋伏過黎搵資源嘅敵人,令到心理戰及戰術更為豐富緊張。

 

規劃搜索路線好重要

又點少得「縮圈」咁緊要嘅野

 

《Black Survival: Eternal Return》早前已經做過四次封測,每次都大獲好評。黎緊喺 3 月 28 日上午 10 時 –  3 月 30 日上午 10 時以及 4 月 4 日上午 10 時 –  4 月 6 日上午 10 時會進行第五次公測,想玩嘅可以去下面傳送門登入 Discord 再跟指示做就可以拎到封測 Key,把握機會阿!

 

《Black Survival: Eternal Return》封測 Key 傳送門

 

五木

五木 動漫電玩宅,極愛金田一系列,擅長動作及策略遊戲

追蹤

更多文章