【遊戲新聞】《動物森友會》都有得玩電競? 外國神網友創作出獨特玩法

《動物森友會》全城爆紅,不過我諗大多數人對呢隻遊戲嘅印象,都係同朋友釣下魚 Hea 下咁(實際上係忙住搵錢還貸款嘅生活)。最近外國就有位玩家發揮創意,喺自己個島上面整咗幾個比賽場地,巧妙地將遊戲搖身一變成電競遊戲!

 

 

日前外國玩家 tetratara 喺 Reddit 上分享一條影片,內容係佢同多位好友一齊於島上進行比賽活動,而呢個活動就係大家必定有玩過嘅「爭櫈仔」。係影片中見到主持人以吹笛為開始訊號,當停止吹笛就要鬥快爭櫈仔坐,不過大家都知道《動森》入面唔係你想坐就坐到咁簡單……。而比賽場地總共有五個,由六個人爭五張櫈開始,最後係爭坐馬桶……。

Musical Chairs Contest 🪑💰 from ac_newhorizons

 

呢個咁有創意嘅玩法公開之後,Reddit 上大獲好評,同時 tetratara 亦都大方邀請其他玩家加入 Discord Channel,方便大家去佢個島度玩(懶自己整咪去 Join 人地玩)。當睇完咁歡樂嘅玩法之後,你又有無興趣黎返場「動森爭櫈仔」電競,又或者試下其他創意例如「動森障礙賽」?

 

五木

五木 動漫電玩宅,極愛金田一系列,擅長動作及策略遊戲

追蹤

更多文章