由獨立遊戲工作室 Chucklefish 開發嘅全新魔法校園 RPG 《Witchbrook》終於公開新截圖！Chucklefish 一向以創作輕鬆但具有深度嘅遊戲見稱，佢地早於數年前已公佈團隊正埋首《Witchbrook》嘅開發工作，不過因為遊戲嘅多線性以及自由度需要更多時間處理，所以目前都未有公開發售日子，對應平台亦未有正式公佈。

玩家於《Witchbrook》當中將飾演入讀魔法學校嘅學生，玩法極為多元化，除左要返學上堂之外，玩家亦可以自習各式魔法咒語去令自己成長。除左上堂交功課呢啲學生嘅本份之外，鍾意《哈利波特》嘅朋友相信會好高興，因為我地仲可以有大量課餘時間去識朋友、去城鎮或者野外探索、去搵出某啲神秘嘅支線等等。

遊戲當中仲有「經營」元素，例如係你點樣經營自己嘅農場（可以鍊魔藥！），以及點樣經營同 NPC 以及其他同學嘅關係。據說遊戲中有好感度設定，到底你會唔會搵到你嘅榮恩成為一生摯友，又可唔可以成功搵到你嘅另一半，都全由玩家自由發揮。

當然遊戲作為一個 RPG 都會有主線，主線就係魔法學校隱藏嘅謎，到底玩家去到最後能否搵出「真相」都係遊戲嘅挑戰之一。

至於最多玩家目前關心嘅發售日問題，Chucklefish 曾經因為被前員工投訴過「工時過長」鬧出勞資風波，所以而家工作室好強調要為員工提供「Work Life Balance」嘅工作環境，所以距離遊戲正式上架嘅日子，似乎都仲有一段時間。

儘管如此，呢隻《Witchbrook》絕對係編輯部密切注意中嘅遊戲，如果你都對佢有興趣，記得繼續留意我地日後嘅報導！