任天堂於 4 月 21 日公佈左《集合啦！動物森友會》嘅更新內容！今次嘅免費更新將於 2020 年 4 月 23 日進行，內容非常豐富，詳細如下：

（1）新增樹瀨「然然」經營嘅流動植物攤檔

相信好多朋友為左儲齊花，經常都要去朋友個島度搵花嘅種子；今次更新之後，只要植物攤檔黎到玩家島上，你就可以買到自己島上面無嘅種子，仲可以買到全新嘅花叢（包括杜鵑花及繡球花）及灌木類植物美化無人島。

（2）傅達博物館升級！開放「藝術廊」，玩家可以捐獻美術品

《動森》間博物館真係做得極靚，不過大家對傅達好啲，唔好下下拎蟲去嚇佢喇！除左化石之外，更新之後玩家仲可以入手埋各種藝術品。

（3）狐狸尋寶船於「神秘海灘」埋岸！出售各式美術品，但係小心有假貨

玩家於島正後方會有一個小小嘅迷你海灘，今次更新之後呢片土地終於派上用場！狐狸尋寶船「九尾」帶來更多消費選項比玩家，不過話明係狐狸，小心佢水你，令你買錯淘寶 A 貨呀。

（4）更新日 4 月 23 日開始至 5 月 4 日為「地球日」

增加獲得哩數

（5）5 月 1 日至 5 月 7 日舉行「勞動節」

出現期間限定「勞動節小島之旅」嘅機票，景觀與收穫將有別於平時外遊島嶼

（6）5 月 18 日至 5 月 31 日舉行「國際博物館日」

去博物館參觀同時進行儲印仔比賽「蓋章拉力賽」，儲夠印仔同時獲得紀念品

（7）新活動「新婚季節」於 6 月 1 日至 6 月 30 日舉行

一對草泥馬新人「莉詠」與「健兆」想舉行六月婚禮，所以佢地去左巴獵島嘅 Studio 影結婚相！你要幫手佈置同埋做龍友，為佢地留低開心回憶。

完成任務嘅玩家可以得到婚禮主題道具。

想睇完整片段嘅可以去呢度！更新完之後一定又會忙到爆……