獨立遊戲工作室 Dischan Media 即將推出全新遊戲作品《Mahou Arms》，係一隻極有白金風格、感覺極似《Devil May Cry》嘅炫麗動作遊戲。遊戲將於 2020 年 4 月 29 日開始早期販售，對應平台為 Steam，正式發售日未定，由 Sekai Project 發行。

「Mahou」係日文「魔法」嘅拼音，而遊戲嘅主題，就係「魔法少女對抗異型軍團」嘅故事，係一隻 3D 動作遊戲。玩家身處嘅地球被外星生物（Alien）試圖攻佔，勢力稱為「Locks」。

為左對抗敵人「Locks」，世界準軍事組織 GARDA 決定以魔法少女作為戰鬥部隊，而玩家嘅身份就係 GARDA 嘅司令官，負責指揮魔法少女。

《Mahou Arms》係一隻受白金工作室《NieR: Automata》、《Astral Chain》等作品影響極深嘅遊戲，所以畫面呈現、操作方式等等，都非常有白金的味道；而玩法方面就有幾分似《Devil May Cry》。玩家可以用「輕攻」與「重攻」配合去使出各種攻擊動作，可以話係非常多彩而靈活嘅動作遊戲。

早期販售期間，玩家可以操作紅白衣裝嘅金髮魔法少女 Amelia 去做主線以及兩個支線任務，而正式版嘅時候仲會追加多三位可操作嘅少女角色，亦會有考驗玩家技術嘅頭目以及關卡登場。

咁當然，遊戲有美少女登場，又點會少得交流元素？玩家飾演嘅司令官亦需要同一眾魔法少女們交流溝通，但係好感度可以換黎乜野效果，暫時就未有好多資料。

題外話：遊戲製作人嘅 Patreon 專頁上面有寫到，如果大家有購買遊戲嘅早期販售，之後會獲得「通行證」去獲得遊戲嘅「未過濾版」，話說 Steam 上架嘅時候必須要將遊戲嘅「某啲成人敏感要素」移除，所以如果大家想知道工作室一開始為玩家設計左乜野福利，記得 4 月 29 日就加入 Early Access 啦！