《集合啦！動物森友會》全球爆紅，各地玩家除咗落力美化自己個島之外，仲有人用另一種方式去表達對《動森》嘅愛。日前就有位韓國網友 southbig，喺 Reddit 上面發表佢自製嘅《動森》短片，短時間內就引起大量網友注意，質素仲非常好添！

呢條《動森》短片其實係一條平時常見嘅動畫 OP（即動畫片頭曲 Opening Song），成條片用八十年風格製作，但係配埋《動森》角色落去又出奇地夾，完全「零」違和感。最正嘅係佢將部份角色嘅形像強化，例如狸克一家係貪婪商人、傅達係邪惡收藏家（明明佢咁可愛）、貌似家燕媽媽嘅青蛙小睫變大隻版等等。當中最搞笑嘅就係賣衫嘅絹兒直接變做超音鼠，雖然第一次見佢就覺得似！（題外話，其實《動森》早喺 2006 有出過官方動畫，不過我覺得呢條自製片還原度仲高過原廠）

80s Anime Style – Animal Crossing New Horizon
byu/southbig inAnimalCrossing

做呢條片嘅韓國網友 southbig，本身就好鍾意將常見嘅作品八十年代化，佢亦有為今次《動森》OP 整咗張 Poster，風格同樣係八十年代，仲幫佢做埋舊化添。另外佢自己個人網站同 IG 有其他作品，例如《復仇者聯盟》、《InsideOut》 、《Frozen》等等，有興趣嘅朋友去睇下同留言支持下佢啦。