《異形》呢個咁出名嘅科幻電影系列應該都唔洗介紹，又由於當初發現異形嘅星球名稱係「LV-426」，所以官方二十世紀霍士喺 2016 年開始，就將每年嘅 4 月 26 日定為「異形日」（Alien Day），並會於當天舉行相關活動。不過由於武漢肺炎關係，今年嘅「異形日」大家都喺屋企避難乜都無得搞，於是就喺 Steam 將成個異形系列以「跳樓級」特價，當中仲有被 Fans 喻為史上最佳異形遊戲 《Alien: Isolation》。

熟知異形遊戲嘅玩家，應該都中過唔少伏，以「異形」命名嘅遊戲多數都係屎黎。但喺芸芸異形遊戲入面，由 Creative Assembly 製作嘅《Alien: Isolation》係非常之好玩，並且得到大多數玩家極度好評。《Alien: Isolation》劇情介乎於電影第一同第二集之間，定位係生存恐怖遊戲，採用第一身視點。遊戲喺 2014 年於 PS4 / Xbox One / PC 上推出，到 2019 年就出買 Nintendo Switch 版。

遊戲最特別嘅地方在於佢係強調「生存恐怖」呢樣野，雖然有得用武器，不過只係對人類同機械人有用，無法殺死異形。同電影一樣，異形係會用視覺、聲音、嗅覺搜索獵物，並無固定巡邏路線，例如玩家跑、用機器等等會令隻異形更容易搵到你喺邊；匿埋喺枱底、櫃入面又要掩住個口避免發出呼吸聲等等。最可怕嘅係異形嘅 AI 仲會逐漸成長，識得去「聯想」事物間嘅關係。例如佢會注意到某個開關被打開，然後就會知道有人曾經喺度搞過開關，跟住就會搵條友出黎，好緊張刺激。

現時《Alien: Isolation》喺 Steam 做緊「跳樓級」特價，95% off 之後只需要 HKD $10.95 就買到，如果真係太得閒的話仲可以買埋其他異形遊戲，都做緊二折。另外同樣由 Creative Assembly 製作、SEGA 發行嘅戰略遊戲《幕府將軍 2：全軍破敵》（Total War: SHOGUN 2）喺 Steam 做緊限時免費，順便收藏埋啦。